Print this page

+++ Dumengia, ils 25-11-2018 a Cuira: «IL VIADI DA NICULIN EN IL PIZ SPIERT»

Ina prelecziun scenica rumantsch-tudestga da e cun Tim Krohn, Ursina Hartmann e Tonia Maria Zindel. Elavurada a moda multimediala da students da la Scola auta da tecnica ed economia STE (HTW) Cuira. 

La tatta da Niculin è sin murir e ses biadi desperà na vul betg laschar ir ella. I sto dar insatge che tegna en vita sia nona. Uschia va el a la tschertga da l'aua da la vita. Las Senzas – che annunzian la mort – giogan medemamain ina rolla sco ils umets selvadis, las olmas che van a spass, ils tils da bara, la mumma veglia ed il paradis apparentamain pers. Umans sa transfurman en animals, animals en umans. Niculin curra suenter a l'aua da l'immortalitad per chapir la finala che quell'aua n'è betg ina medischina che po salvar sia tatta, mabain in lai sutterran, nua che tut la vita svanescha suenter la mort e resorta puspè en ina nova furma. Davos quest maletg stat il patratg che la mort, sco era mintga magia, prenda ad ina creatira mo sia furma e la dat ina nova. La vita sco tala è indestruibla, perpetna. Nagut na va a perder. «Sco quai ch'igl è sura, uschia èsi era sut» – la lescha perpetna da l'alchemia. 

Ina coproducziun cun la STE Cuira (HTW Chur), en collavuraziun cun la Lia Rumantscha. 

Las 18 en la STE Cuira

Cun: Tim Krohn, Ursina Hartmann, Tonia Maria Zindel 
Producziun dal film: Salome Brenner, Fabian Arnold (STE Cuira) 
Dapli infurmaziuns: http://sagenmaerchentage.ch/

Dar ina nota a questa contribuziun
(0 vuschs)