Da Benedetto Vigne - Berna resta il center da noss mund «mundartig». Gist dus producziuns actualas ans demussan la forza superiura da la musica pop e rock bernaisa. L’ina deriva dals oramai veterans Züri West, l’autra dals quasi-novizs Jeans For Jesus. E domadus èn capolavurs.

«Love» è il titel laconic dal dudeschavel album dals Züri West. Tant pli sarcastic para quel, sch’ins considerescha ch’il tenor dal disc dechanta amurs spussadas, decadentas, mezmortas. «(Sie isch) ggange ohni z’gah» di gia il segund titel da l’album, ed en in’autra chanzun lamenta Kuno Lauener dals dis ch’ins resta tuttina anc ensemen, malgrà la lungurella vicendaivla. Quai tuna da resignaziun e dischillusiun. Da serra-char. Ma sch’ins taidla la musica, lura sa demussa tut quai sco ina finta: Ils Züri West èn usché frestgs, viscals e musicantics sco daditg betg pli. Quai ha magari da far cun la regiuvenaziun che la gruppa ha uss fatg tras, nov èn il bassist Wolfgang Zwieauer ed il ghitarrist Manuel Häfliger da la partida, e gist l’ultim da quels briglescha cun solos vaira claptonians anc mai dudids tar la venerabla gruppa bernaisa. Surtut en la ballada deditgada al poet Jean-Pierre Schlunegger.

L’album traglischa però er tras sia varietad, sper intgins veritabels spazzastradas rockus udin nus apunta er inqual tun pli amiaivel, pli fin. Straordinaria è qua la versiun bernaisa d’ina classica melodia da Bob Dylan, la quala Kuno Lauener translatescha cun «Mir wei nid grüble (es isch scho rächt)» e chanta cun ses usità scutinim autoconscient. Insumma celebrescha Lauener inquala bella istorgietta, l’agen cumparegl cun in cudogn («Quitte»), il purtret dal giat impertinent, il regord dad in turment envers il frar pitschen. Ina da la pli bellas è la nostalgia dals onns 60, cur ch’il chantant era anc bagai e sa siemiava da daventar da grond in … talian.

Regurdientschas chattainsa er tar ils collegas giuvens dals Züri West, ils nov-celebrads Jeans For Jesus. Là tanscha la reflexiun però be dals ventg-e-raps enavos sin la fasa teenageriana (u «mendratscha» schessans per vegl rumantsch) da deschset onns, en la chanzun «XVII» (ina reprisa d’in titel da Youth Lagoon). Tant pli grev èsi tar quella gruppa dad eruir istorgias, perquai ch’ella lavura bler cun gieus da pleds, cun anglizissems e cun ina poesia assoziativa ch’ins pudess bunamain numnar «stream of consciousness», pia lirica subconscientica. Nus entupain frasas sco «oh mueter spöi mi a di wäutchuglä», ubain «spiu gitarre du idiot für bedütigsschwangere schlächte sex». Tals sproposits poetics van fitg bain a prà cun il chant falsett, androgin e ferm articulà da Michael Egger, in chant che s’integrescha organicamain en las texturas sinteticas ed electrofunkigas da la gruppa.

Precis, ils Jeans For Jesus han paucas ghitarras e bler sintesaisers, els fladan in’aria zunt metropolitana, urbanistica, globala – gia la chanzun «L.A.» sin lur primalbum dal  2014 aveva signalisà quel caracter – els reflecteschan consum ed abundanza invana («uh uh uh d wäut isch nid gnue»). Ed els celebreschan l’amur en tut sias furmas, lur «lovin» gioga rima cun «Löwin», ed en in lieu denumnan els «pussy u schwanz». A l’album che porta l’enigmatic titel «PRO» agiunteschan els in flocon da parfum cun il medem num. Quels quatter bernais n’èn ditg betg anc spussads da la vita, u sco ch’els din en la chanzun che citescha en il titel ils dus rockadurs Neil Young e Kurt Cobain: «Chum mir brönne nie us».

Züri West: Love (Sound Service); Jeans For Jesus: PRO (Universal).

Text: B. Vigne, Turitg   Fotografia: (c) by Walter Schaer /  http://www.jeansforjesus.net/

 

PROXIMS CONCERTS:

28.04.2017, Düdingen
Bad Bonn

13.05.2017, Lucerna
Schüür


Suonda LATABLA!