Dad Annatina Nay - Mintgaton s’imaginel ina creatira che sesa vid ina meisa da lavur. Sin quella meisa ha ei nundumbreivel biars pupials cun notizas e cartas geograficas, forsa in giug cun figuras, tocs da cumbinialas, vid las preits pendan moniturs da computers che muossan situaziuns ord il mintgadi. Ina imaginaziun humana – ina creatira cun tratgs humans – aschi humans sco jeu mezza sai s’imaginar ella. 

Tgi ei quella creatira e tgei fa ella? Ina risposta concreta enconuschel jeu buc. Ella savess esser nies destin – ni forsa gioga ella la pura casualitad en nossas vetas. 

 

Ina veta casuala

Ils ins pretendan ch’ei detti negina casualitad, ils auters rin sur dil destin. Nus essan mo in toc puorla el mund gigant, en ina galaxia senza cunfins. Ed uss? Dat ei per mintgina e mintgin da nus enzanua in script cun in toc da teater cul num „mia veta“? Quei ei bein absurd? Tons tocs da teater che giogan parallelmein – carstgauns che han da giugar pliras rollas el medem mument, rollas principalas, rollas lateralas, statists. „Nuot ella veta ei casual“, ha ina dunna detg a mi tschei di. Jeu sesevel casualmein sin in baun e spitgavel sil bus. „Miu tema“, hai jeu tertgau ed entschiet a discutar. Ella creigi vid karma, ha ella detg. Tut il bien ch’ins fetschi vegni anavos tier ins. Da quei seigi ella perschuadida. En quei mument ei il bus vegnius ed jeu sun ida. Curiosa situaziun casuala ni veva quella forsa in senn? Il senn da patertgar suenter puspei pli intensiv sur da tals temas? 

Tut destin ni tut casualitad? 

Mintga pintga decisiun ei in motiv per ina consequenza. Sch’jeu vess priu igl ascensur enstagl dad ir a pei da scala si, vess jeu buca entupau la vischina ch’jeu hai daditg buc pli viu – ed ella vess era buca raquintau a mi che siu fegl vendi (gest oz) in velo da cuorsa – naturalmein exact aschia in ch’jeu level gia adina cumprar! Ed uss sun jeu casualmein daventada possesura dad in velo da siemi! Destin! Ston ins forsa esser cartents per saver crer vid il destin? Forsa ch’ins sa era influenzar in tec igl agen destin cun metter fil en guila – cun sepreparar sin differentas situaziuns, per exempel da mai pli prender gl’ascensur!

Dus dis pli tard sesel cun in amitg egl auto. En cuort va el a star a Madrid. Pervia dall’amur. Els ein casualmein puspei sentupai suenter siat onns. El era daniev single, sin viadi, casualmein en Spagna ed enzanua sin via a Madrid ein lur vias secruschadas. Ella era è single. Aschia seigi tut mo stau ina damonda dil temps. Avon siat onns eran els s’entupai en in parc. Ella veva natalezi. Els vevien festivau ditg e liung. Suenter veigien els mai pli udiu ni viu in l’auter! „Tgei casualitad da puspei s’entupar. A Madrid vivan treis milliuns carstgauns!“, hai jeu detg. „Propablamein ha ei stuiu esser aschia“, ha gl’amitg detg. „Creis ti vid destin?“, hai jeu dumandau. „Jeu sai buc. Mintgaton hai jeu il sentiment ch’ei fetschi cun mei il dretg e mintgaton va tut da l’aua giu. Gest uss ei tut bien!“

Text:  Annatina Nay
Fotografia: pixabay.com
Emprima publicaziun: 30.05.2018


Suonda LATABLA!

---

Dad Annatina Nay - Ils carstgauns vulan tudi categorisar, metter en truchets per capir. Tut quei ch’ins sa numnar pil num ei capeivel. Tut quei ch’ins sa exprimer san ins era capir. Nus essan diversitad heterogena. Affons, carschi, glieud veglia. Ils foss denter generaziuns ein profunds. La capientscha in per l’auter – savens forsa empau pintga?

Stuess buca tut flessegiar? Stuess buc tut esser en moviment? Nies mund – in mund pleins da generaziuns fluidas? Enstagl da quei: in mund plein carstgauns vegls cun spérts giuvens e giuvens che sedattan vegls e conservativs en lur patertgar. E lu dat ei aunc carstgauns che suondan neginas vias classicas – vivan senza cunvenziuns. En tgei truchet pomai metter lezs?
 
X, y ni z?
Generaziun x, generaziun y, generaziun z.
Tgei bustab eis ti?
X – la generaziun che selai buca secategorisar – tut che semischeida, tut en moviment, tut ei pusseivel – po buca sefixar.
Y – la generaziun „why“ – quels che damondan adina suenter il daco e dacum ed insumma.
Ni z? Datti gia ina generaziun z? Il rest, la fin?
Nus – carstgauns digl emprem mund astgein adina sedecider – per ni encunter: in studi, per ni encunter: l’amur, maridar, haver affons, far carriera, far negina carriera. Per ni encunter: haver raps, ni haver temps, viagiar, star a casa, prender drogas, far sport, consumar, spargnar. Decider, senza stuer prender risguard sin finanzas, situaziuns politicas, repressiun – tut ei avon maun – e quei en abundonza.

Ed jeu?
Ed uss sesenflar in mund nua che tut ei pusseival – in pensum per veta duronta. Sun jeu uss x, y, z? Forsa in tec da tut e tuttina nuot? En quei forsa x, en tschei in tec y, en zatgei auter forsa tut normala ... in dilemma.
Tgei sun jeu uss propi? Nua stun jeu? Jeu sun bia e tuttina nuot endretg. Forsa sun jeu tut enina? E lu entscheivel a sesanflar, jeu sun quei e quei e quei, in tec quei, massa quei e lu aunc tschei. Jeu sun ina summa da bia.

Sligiaziun slash!
Jeu sun slash. Slash, il streh cursiv denter dus plaids. In segn d’interpuncziun che vegn duvraus savens per sparter ni per enumerar. Jeu sun ina dunna /slash/ jeu lavurel sco grafichera independenta /slash/ forsa mintgaton era sco artista /slash/ jeu dun scola /slash/ jeu hai biars interess /slash/ jeu vi scriver /slash/ jeu vi viagiar /slash/ jeu vi buca schar metter mei en in truchet /slash/ vinavon, anavon, adina en moviment, adina fluid: viers gl’infinit ...
 

Text e fotografia: (c) Annatina Nay, http://www.annatinanay.ch/


Suonda LATABLA!

---

Dad Annatina Nay - Duas figuras en in toc da teater da Samuel Beckett. Estragon e Wladimir sesanflan en in liug buc definau, sin in stradun, sper ina plonta. Els passentan lur temps cun far nuot e cun spitgar sin Godot. Els sez enconuschan buca Godot, els san gnanc sch’ei dat insumma el. En certs muments han els denton speronza che Godot arrivi beinprest. Spitgar sin Godot ei in’activitad senza senn – forsa schizun empau lungurusa. El cumpara numnadamein mai. Il sulet che varga ei il temps. Estragon e Wladimir spetgan.

Muments vits

Per beinenqual ei spitgar in temps nizeivel, per auters ina peina. La veta ei spitgar – ils carstgauns quels che han da spitgar. Mintgin – ti ed jeu. Alla cassa dil Volg, sin posta, alla staziun dil tren ni alla staziun dil bus. Avon il kino, avon il teater, avon la bar. Savens el restaurant. Al runal ni per ir sin tualetta. Sin rispostas, sin persunas, sin muments, sin midadas. La sera en letg sin la sien, la damaun sin ch’il svegliarin scalini. Sin l’amur dalla veta, sin la fin d’ina sesida lungurusa, sin l’entschatta da zatgei interessant, sin ch’il mund mondi sutsu, sin ina naschientscha ni sin la mort. Il temps da spetga para savens vits. El varga pli plaun, el ei liungs – sligiaus dil sentiment da temps. Nus spitgein e sperein sin in mument d’acziun – sin il mument che Godot cumpara.

Spitgar ei lungurus

Il temps da spetga ei in temps denter dus temps – en in cert senn ina zona vita, in temps che nus lein savens puspei emblidar, perquei che nuot para da schabegiar. Forsa schizun in temps empau lungurus? Duront spitgar mirein savens viaden el telefonin, scrivin tonnas messadis, repartin likes, tedlein musica e navighein tras la reit digl internet per sepiarder sin paginas infinitas. E lu vesin nus che la persuna che ha recepiu il messadi da whatsapp ha gia legiu el. Ok ... e nus spitgein – sin sia risposta! Tenin strusch ora la tensiun.

Daco ha ella buca gest scret anavos a mi? Ha ella buca temps, ni forsa enzatgei pli perdert da far? Vul ella buca scriver, ni ha ella forsa autras prioritads?

Nus mirein per l'aria – contemplein ils carstgauns entuorn nus, tedlein lur dialogs ni silmeins fragments da quels e fagein apparentamein nuot.

Ti sas buca patertgar nuot

Quei ei nunpusseivel. Estragon e Wladimir fan nuot auter che spitgar sin Godot e patertgar igl entir temps vid quel, schegie ch’els enconuschan buc el. Jeu contemplel la dunna cun il manti tgietschen, fetsch in link tier la persuna ch'jeu hai scret il messadi e sedamondel daco ch'ella ha aunc adina buca rispundiu?

Ok, sch'ella rispunda buca tochen damaun marvegl dun jeu in telefon! Jeu spetgel e fantiseschel – emprovel da sedeclarar la situaziun, enquerel declaraziuns per mei e pil mund. Forsa ha ella veramein buca temps. Jeu spetgel. Jeu stoi tener ora da spitgar. Igl ei buc sempel e perquei forsa insumma buca lungurus, mintgaton schizun empau stentus. Spitgar e schar vargar il temps, senza piarder la pazienzia. Jeu spetgel e sperel che Godot arrivi tuttina aunc e ch'il toc da teater prendi forsa tuttina ina fin da surpresa.

Funtaunas: Becket Samuel, Waiting for Godot, 1952
Text e fotografia A. Nay, http://www.annatinanay.ch/


Suonda LATABLA!

---

Dad Annatina Nay - Tgei ei cletg e tgei ei ventira? Ha cuntentientscha la medema muntada? Damondas existenzialas! Sun jeu cuntenta? Sun jeu ventireivla? Per tudestg „Glück ni glücklich“ – per engles „happiness ni happy“. La definiziun per romontsch ei pli cumplexa! Avon entgins dis hai jeu visitau in’exposiziun el Museum für Gestaltung a Turitg cul num: „Die happy Show“. Igl artist e graficher austriac Stefan Sagmeister che viva e lavura a New York, avisescha all’entschatta dall’exposiziun ils visitaders che la viseta da tala fetschi els buca pli cuntents ni ventireivels. Igl ei tuttina in’exposiziun inspironta ed informativa. Quei text sebasa sin cuntegn dall’exposiziun ed ei ina rimnada persunala da fragments e patratgs ch’ein restai e han intimau mei da reflectar.

Raschuns per tiu cletg

Daco eis ti cuntents? In fatg: Motivs per tiu cletg ein per 50% genetics, 40% dependents da tias activitads sco per exempel sport ni meditaziun, per 10% decidan tias cundiziuns dalla veta, ils facturs che selain buca midar sur da tiu cletg. Stefan Sagmeister viva, sco el pretenda sez, ina veta cun certs privilegis – suenter siat onns da lavur fa el mintgamai in onn pausa. El argumentescha sco suonda: „Ils emprems 25 onns da nossa veta emprendin nus, ils proxims 40 onns essan nus occupai cun luvrar. A nus restan aunc biabein 15 onns veta en pensiun. Jeu vi scursanir mia pensiun per 5 onns e far suenter mintga siat onns in onn sabbatical denter mes onns da lavur. Aschia sun jeu pli productivs e mias ideas flessegian puspei anavos ella societad.“

Con cuntents eis ti?

Sin ina scala da 1 entochen 10? Gest uss en quei mument? Stefan Sagmeister citescha il matematicher e filosof franzos Blaise Pascal che pretenda gia entuorn 1650: „Mintga carstgaun less esser ventireivels, senza excepziun, nus tuts lein contonscher quella finamira..." Igl esser cuntents e ventireivels stat en relaziun cun nos basegns e quels vegnan ordinai en fuorma da piramida, l’aschinumnada hierarchia dil cletg tenor Abraham Maslow. Basegns fundamentals sco aua, aria, nutriment, sien e sex alla basa vegnan suandai da sanadad, lavur ed in dacasa. Relaziuns socialas stattan sin posiziun treis. Success e creativitad alla tschema. Sche ti stuessas uss aunc inagada rispunder alla damonda dall’entschatta? Tgei posiziun dad 1 entochen 10 silla scala dil cletg tschernessas? In’autra, ni forsa puspei la medema?

Mia tscherca

„Anfla il cletg mei?“ Avon circa 15 onns hai jeu survegniu in cudisch cun quei tetel. Il cudischet dil duo artistic Fischli/Weiss cuntegn paginas neras, scartira alva, massa citads e damondas. In di hai jeu schenghegiau vinavon el ed in pèr onns pli tard puspei survegniu in identic da zatgi auter. Il cudisch ei daventaus in dils preferi. Cletg e ventira tuornan adina puspei – en undas e ciclus. Cletg e ventira anflan mei ed jeu anflel els. E per finir in citad da Stefan Sagmeister: „Everything I do always comes back to me.“ In encurir ed anflar perpeten. Igl ei tut mo ina damonda dalla perspectiva.

Funtaunas

Cudisch: Peter Fischli, David Weiss: Findet mich das Glück, 2002

Filosof: Blaise Pascal http://www.zeit.de/1979/42/pensees

Abraham Maslow, Hierarchie des Glücks, Bedürfnispyramide
https://de.wikipedia.org/wiki/Maslowsche_Bed%C3%BCrfnishierarchie

Stefan Sagmeister http://sagmeisterwalsh.com/

Exposiziun: Die happy Show
http://www.museum-gestaltung.ch, http://sagmeisterwalsh.com/work/all/the-happy-show/

Film: The happy film http://www.thehappyfilm.org/

Text e fotografia A. Nay, http://www.annatinanay.ch/


Suonda LATABLA!

---

Dad Annatina Nay -

... dalla Spagna, Italia, Grezia, dad Amsterdam ni New York! Cu has ti scret tia davosa carta postala, a maun, cun taccar si ina marca? Tgi scriva oz insumma aunc cartas postalas? Mo persunas sur 70, mo affons da scola? Scriver cartas ei bein total onns 90, oldschool, oz forsa perfin in tec retro? Analog ei retro, mo caussas analogas svaneschan pli e pli fetg ord nies mintgadi – era sch’ei dat cuntertrends. Quei ei fact. Mo pertgei schar svanir diltut las cartas postalas? Scrivi dapli cartas postalas a voss cars!

Scriver cartas dat lavur
Uonn hai jeu scret suenter biars onns e suenter esser stada meinsvart naven entginas cartas postalas da mias vacanzas. Bien, jeu mezza sun forsa in tec oldschool e hai ina fleivlezia per retro, mo prender la peda, cumprar las cartas al kiosk, cuorer en in’autra stizun per marcas, studegiar tgei scriver e lu scriver las cartas, encurir egl internet las adressas exactas da posta e silsuenter anflar ina scaffa da brevs (che ei buca mo ina attrappa) ei nuota aschi sempel.

In dètg effort duront las vacanzas che duein bein esser (mo) recreativas!

Daco far cumplicau?
Igl ei oz pli sempel da tarmetter in maletg cul telefonin ni da cargar in tal sin ina reit sociala: Mia vesta dalla combra dil hotel, jeu sper la mar, jeu ell’aua, jeu sper in’attracziun culturala ... Jeu partel cun mes amitgs digitals il messadi: Cun mei vai bein, dolce vita – dis da mai murir, cars salids da mias vacanzas! Pia daco buca mo tarmetter salids contemporans enstagl da tarmetter ina carta sblihida cul verset „Tanti saluti di Roma“, ina carta plein puorla che deriva opticamein ord il davos milleni? Alla fin finala drovan cartas postalas jamnas, mintgaton meins entochen ch’ellas arrivan en scaffa da brevs.

Sin viadi
Mias cartas ein sin uss sin viadi. Jeu mezza sperel era da survegnir entgins salids analogs ord differentas parts dil mund. Mintga di arvel plein tensiun la scaffa da brevs e sun trumpada sch’jeu sai mo prender neuadora la gasetta ed entgins quens. Il viadi dalla carta postala ei liugs, va dad in maun en tschel – cun tren, cul bastiment, cugl aviun. Jeu s’imagineschel tgi che vegn aunc a leger mias cartas, mias historias ed aventuras, forsa in pot ell’Italia, probablamein era aunc in dus en Svizra?

Cartas postalas ein pédras publicas denter la posta meinsvart alva ed unificada. Maletgs stilisai, il tschiel e la mar en in blau azur – pli blau che blau, palmas, sablun, sulegl – messadis meinsvart persunals e secrets ... Miu telefonin vibrescha. „Oz ei tia carta postala arrivada! Engraziel fetg per parter in toc da tias vacanzas cun mei!“, legiel jeu sin miu display. Quei ei bein in bien motiv da puspei scriver cartas postalas la proxima gada!

Text: A. Nay, http://www.annatinanay.ch/
Fotografia: www.pexels.com

Suonda LATABLA!

---

Dad Annatina Nay - Forsa ei tiu paradis in cuolm, in vitg, in marcau, in’insla? Lunsch naven, ni datier, in liug freid ni cauld, in siemi. Alla tscherca da miu paradis persunal haiel anflau in’insla, mar ed ina riva plein plastic. Quei era buca il paradis ch’jeu s’imaginavel, lez fuss probabel staus in tec pli schubers. El sablun plastic, ell’aua plastic, pachetadis da plastic e butteglias da plastic. Plastic ei bein in material pratic – in material ch’ei deplorablamein fatgs per l’eternitad.

En in onn vegn produciu circa 240 milliuns tonnas plastic sil mund, varga 50 milliuns tonnas sulettamein pil diever en l’Europa. Ellas mars senodan milliuns tonnas plastic – en tschun turnighels serimnan mantuns, gronds sco inslas. Fact ei ch’il plastic ei in grond problem – quei savein nus tuts gia daditg. Plastic vesibel e nunvesibel – microparechels ell’aua che vegnan pri si en nossa cadeina da nutriment, perquei che pèschs scumbeglian els cun plancton. Jeu vi buca moralisar – leutier hai jeu negin dretg. Jeu mezza possedel (memia) bia plastic. Jeu cumprel quasi mintga di senza vuler plastic per gest puspei fierer naven quel. Jeu beibel ord butteglias da pet senza ponderar che la gronda part da quel vegn gnanc reciclada – igl ei semplamein fetg cumadeivel. Nus pachetein nies rumien en sacs da plastic – per schar barschar quels ellas barscheras. Voilà, naven!

Dapertut plastic

Plastic – il tema che fatschenta gest pir che mai. Plastic en pachetadis, textilias, colas, material da baghegiar. Ei dat strusch enzatgei ch’ei dat buca ord plastic. Calzers, autos, cabels, vischala, pusada, strubas, vestgadira, protesas, madrazzas d’aria, barschuns da dents. Mass ei senza?
Jeu schaiel sin miu schigentamauns el sablun, mirel viadora ella mar ed observel in um che raschla ensemen rumien cun in risti. Silsuenter cava el profundas ruosnas el sablun. El cava ad in cavar e lai svanir il rumien ellas ruosnas. Lu cuviera el quellas cun sablun e petga culla pala sissu. A fin. Il plastic ei naven.

Silmeins per oz e pils turists che schain sper la mar. Satrau il problem. L’auter di il medem proceder. Jeu schaiel sper la mar e hai schliata cunsciezia. Jeu savess mezza ir a rimnar ensemen plastic. E lu? Nua metter? Tgei far en in sistem senza sistematica da dismetter rumien? Reciclar exista buc. La soluziun ei barschar. E quei fa mintgin privat. Avon casa – ni en curtin – ni alla riva dalla mar. Dalunsch il fried da plastic barschau. Las restonzas vegnan en cuort purtadas ell’aua cul vent...(leger enavant pli giu)

---

No waste – low waste

Jeu fetsch retschercas. Ella reit anflel artechels e maletgs. Jeu mirel documentaziuns – senza fin. Balenas mortas allas rivas, pleinas cun plastic. Scamonds da sacs da plastic. Microgranulats en scarun. Ils fatgs ein pesonts. Co sai jeu sco pign pèsch contribuir? Jeu emprovel da sminuir miu consum da plastic persunal cun cumprar en cunscient. Aschia eviteschel butteglias da plastic – cumprel legums sin fiera ni maglias danovamein en ina stizun che porscha negin pachetadi. Il pachetadi prendel cun mezza – glasa ni satgets da teila. Igl ei buc cumadeivel dad ir tras igl entir marcau cun in saccados plein glasa vita. Cumprar en drova uss planisaziun. Spontan munta plastic. No waste ei denton quasi nunpusseivel, mo jeu emprovel da practicar low waste. Semplamein aschi pauc plastic sco pusseivel per tuttina aunc saver semiar d’in ver paradis.

Cumprar senza pachetadi

www.foifi.ch (Turitg)

www.palette-bern.ch (Berna)

www.bareware.ch (Winterthur)

www.baselunverpackt.ch (Basilea)

 

Films e documentaziuns (ina schelta)

www.plasticoceans.org

www.plastic-planet.de/

www.srf.ch/sendungen/dok/helden-des-abfalls

https://www.itsafishthing.com/plastic-in-the-ocean/

Text: A. Nay, Turitg
Fotografia: Freeimages.com

Suonda LATABLA!

---

Dad Annatina Nay - Jeu sun uss anti-fitness e stoi conceder. Il center da fitness hai jeu gia daditg buca pli viu da dadens. Tschei di ha ina dil center perfin telefonau a mi e dumandau sch’ei seigi tut en uorden cun mei. Jeu seigi bein gia in temps buca pli stada el center. Gest ussa cura ch’il temps da bikini vegni adina pli e pli datier! Gie, hai jeu rispundiu, jeu vevi empau bia da far. Oravontut en temps da stress duess ins buca calar cun fitness – quei seigi il mender, ha ella manegiau. Sche ella lessi uss far a mi schliata cunscienzia?, hai jeu dumandau empau brut. La fin finala decidi bein jeu sco clienta. Sin quei ha ella mess giu il telefon.

Anti-bikini!
Pah, temps da bikini! Pervia da mei savessan nus schar quei temps nua ch’el ei! Jeu sun uss tonaton anti-bikini e loscha possesura d’in costum da bogn. In costum da bogn ei ina invenziun magica. Quel zuppa tut e lai guder mei cun buna cunscienzia ovs e lieurs da tschugalata. Pastgas ei tonaton il pli bi temps digl onn – pli bi che Nadal, Tscheiver e vacanzas da stad ensemen. En stizun spassegiel plein queidas tras las crunas pleinas da dultscharias pachetadas en pupials dad alu. Ils scazis tarlischan en tuttas colurs ed jeu sesentel ella tiara dalla cucagna. Jeu vi empruar in iev da tschugalata da mintga sort e tuornel a casa cun ina tastga plein bienas. Buontad quels ovs cun gianduja! Mhhmm ovs da stracciatella. E pér quels cun caramella – in siemi! Jeu magliel e gaudel dis en e dis ora, senza studegiar vid il temps da bikinis. Gl’ei bein bi sch’ins sa guder il

s ovs da tschugalata gia meins avon Pastgas.

Anti-fit
Jeu hai bein stuiu sluccar il nuv dallas jeans suenter gentar. Has ti forsa priu tier?, ha ina collega da lavur dumandau mei. Hmm ... forsa in, maximum dus kilos. Daco? Vesan ins quei? Forsa era treis ni quater?, ha ella dau la tecca. Mo quei seigi gie buca da smarvegliar – dapi ch’jeu senutreschi quasi mo da tschugalata seigi jeu ida si sc’ina cocca! Sche quei seigi nausch? Coccas seigien zatgei bien, hai jeu rispundiu. Na, mo forsa empau nunusitau el temps che tuts seigien plitost anti-tschugalata.

No-carbs, low-carbs e tgei ch’ei detti tut. Quels che maglien tschugalata e dultscharias seigien exots. Tschugalata fetschi bein al cor ed all’olma, hai jeu rispundiu. Per tia figura e tia pial ei quei niente, ha ella detg. Mavas ti buca meinsvart a fitness, ha ella dumandau. Buca pli, hai jeu detg. Jeu sun uss anti- fitness. Ti eis empau anti-bia, ha ella replicau e ha ris.

In tec pro!
Quei constat buc! Jeu sun buca mo anti – jeu sun savens era in tec pro! Jeu sun pro-apéro, pro-chips, e pro-star sin canapè. Jeu sun pro-far il chillen, pro-durmir ditg e pro-seser en ina bar. Jeu sun pro-vacanzas, pro-magliar quei ch’ins ha gust e pro-magliar aschi bia dultsch sco ins vul. Jeu sun perfin pro-anti-fitness e pro-anti-bikini. Mia collega da lavur ha mirau in tec da quei tup e ha detg nuot pli. Quei cun pro ed anti ei bein aschia ina caussa, hai jeu aschuntau. Il meglier decida mintgin sez tgei che constat per el ni ella.


Text: A. Nay, http://www.annatinanay.ch/
Fotografia: www.pexels.com

Suonda LATABLA!

---

Dad Annatina Nay - Fitness ei aunc buc daventau miu niev hobi e probabel vegnin nus mai ad esser megliers amitgs – il fitness ed jeu. Mo jeu serebetschel uss regularmein silmeins ina gada ad jamna ella tauna dil luf, possedel perfin in niev outfit (vul dir caultschas e tschappas novas) e sai tschentar en ed ora mezza il schinumnau „crosser“. Dapi circa dus meins sun jeu part da quei club e stoi conceder: Il center da fitness ei daventaus per mei dapli in liung per far studias socialas che studias sur da miu agen tgierp. Jeu sai, jeu vegnel mai ad haver in sixpac. Quei ei absolutamein ok. Aschia che vegnel era mai a saver trer en in top che cuviera buca il venter. Era quei ei totalmein ok.

La matta cul club mate
In gliendisdis endamaun el center da fitness. Suenter studegiar ditg vi e neu ed insumma, sun jeu semessa sin via el center da maschinas. Entscheiver ina nova jamna en moviment ei bein in bien propiest. Pér da dretg suenter ina fin d’jamna pulit malsanadeivla – empau bia vin, empau bia gervosa, empau bia gin-tonic, empau bia sortida e fetg pauc sien. Uss hai num suar ora las calorias ed ils puccaus.

Jeu semettel sil crosser ed entscheivel a marschar - hoppla hop el ritmus da mia musica. En buc ditg semetta ina matta sil crosser sper mei. Ella porta hotpants ed in top. Sin tgau in pindel da suadetsch pinc ed enta maun ina butteglia da veider cun Club Mate. Ella pren in schluc. Okay ..., tratg’jeu. Mate el center da fitness? Hai jeu munchentau in trend? Forsa vegn quella gie directamein dalla sortida? Tgunsch aunc mess viaden in schuss vodka. Jeu savess gie dumandar sch’jeu astgi è ver in schluc, tratgel jeu e seregrodel vid mia davosa sera cun Club Mate-vodka. En miu tgau in film, e lu aunc in ... mes patratgs scappan en autras sferas. Ed jeu sun naven. Quei schabegia a mi meinsvart duront activitads ton monotonas. Jeu vesel mei da lunsch. Jeu lavurel en ina fabrica vid ina pindella. Dis en, dis ora ils medems moviments. Jeu mettel avon con lungurus che quei ei, con vit entochen ch’jeu vegnel destadada dad in griu. Aaaaahhhh!

Superman
Sil fiat totalmein allerta! Cul tgau anavos el center da fitness. Tgei ei schabegiau? Ha zatgi survegniu ina peisa giu pil pei? Jeu mirel enturon e vesel – el. Miu diu! Superman! Jeu fruschel ils egls e crodel bunamein giu dil crosser. Superman emprova dad alzar ina termenta peisa e dat aunc inagada ora in buorl. Quel va a mi tras pial ed ossa. Superman ha tgau blut, pial stgira e musclas giganticas. El fa tema a mi. Suadetsch daghira da siu frunt sur siu pèz giun plaun. Superman schema sc’in taur tscharva tras l’entira sala e pitescha ad in pitir. Mintgina da sias musclan tremblan. Puspei in griu! Per oz hai jeu avunda. Jeu bandunel ton pli spert il center da fitness, mon sin via a casa aunc spert tiel pasterner. In croissant ed in cappucino take away. Suenter quels strapazs ei quei bein ina pagaglia meritada!

1000 stgisas
Entgins dis pli tard emprovel da semotivar da puspei ir a fitness. Quei fuss gia la secunda gada en in’jamna – in record persunal. Mo mes patratgs vid Superman e la fina bial’aura fan svanir mia motivaziun avon ch’jeu sai insumma sedecider da pachetar mia tastga.

Alternativas fussen: Ir a cuorer ni a spass. Jeu sedecidel dad ir cun velo tras il marcau e far in pèr cumissiuns. A fitness sai jeu ir in’autra gada. Miu abo vala bein aunc varga diesch meins. Sche quei ei buc stau in’investiziun pil giat! Jeu studegel co jeu savess per in’autra gada investar pli lucrativamein mes daners. Forsa fussen dar lotto ni ina viseta el casino bunas opziuns?!

Text: A. Nay, http://www.annatinanay.ch/
Fotografia: Wikipedia - http://spongebob.wikia.com/wiki/Donald_the_Shark

Suonda LATABLA!

---

Dad Annatina Nay - In onn niev cun massa novs propiests. Varga in dudischavel digl onn 2017 ei uss denton gia historia. Suandeis aunc adina vies plan? Buca fimar, beiber alcohol mo la fin d’jamna, parzialmein detox da medias socialas, negin handy avon ir a durmir, dapli sport? Jeu hai definitivamein priu avon da semuentar dapli egl onn 2017. Miu dies ha gia dau sinzur. Seser dis en e dis ora avon il computer ei la cuolpa! Aschia sun jeu sedecidida: miu 2017 daventa sportivs. Forsa hai jeu schizun mess empau ault la latta. Far sport ei stregn e drova bia temps. Temps hai jeu pilpli mai ed in canun da sport sun jeu mai stada – schiglioc havess jeu probabel gia entschiet avon – mo igl ei dil reminent mai memia tard – era buca per mei. Aschia hai jeu priu ensemen tut mia curascha e la via sut ils peis – en direcziun center da fitness.

Igl abonnament
Giuado eis ei freid e bletsch. Ei ha duvrau entginas emprovas per semotivar. Jeu hai adina anflau ina stgisa ni pliras. Mal il tgau, stauncla, negin gust, tut enina ... Mo propiest ei propiest – quel vala ed ei da tener tras. Ina sera miez schaner serabetschel finalmein ord casa. Igl ei il dretg mument per ir.

Il center sesanfla ella tschunavla alzada. Prender igl ascensur ni la scala? Jeu seturpegiel d’insumma setschentar quella damonda e mon da scala si. Jeu buffel sc’ina locomotiva. La dama alla recepziun mira sin mei da tgau entochen pei. Ella posseda in’egliada da scanner, volva decentamein ils egls e damonda en in tun unfis co ella sappi gidar mei. Jeu less far in abonnament, ditgel jeu. Aha! Sche jeu seigi gia stada en in center da fitness?, ha la dama vuliu saver. Quei seigi mia emprema gada, hai jeu detg. Aha!, ha ella puspei rispundiu e danovamein inspiziau mei. Propi da casa sun jeu buca sesentida. In abonnament per in onn? Sch’ei detti era da quels per pli cuort?, hai jeu dumandau. Ella cussegli a mi in per in onn – in per pli cuort porti nuot. Jeu hai anflau negins arguments encunter e hai suttascret. Puh! Dumignau gl’emprem obstachel. Cura che jeu lessi lu far miu trenament d’introducziun?, ha la dama dumandau. Il pli bugen gest uss, hai jeu rispundiu e la dama ha ris per l’emprema gada.

Igl outfit
Jeu crodel si – e quei buca exnum el senn positiv. Miu t-shirt e mias caultschas barlaccas ein aschi 2005! Penibel! Las autras dunnas portan leggings, tschappas da colur neon e definitivamein meins grass vid il venter. Ils umens han en ‚muscleshirts’. Ins vesa mintga muscla e mintga muscla para da clamar: Hallo! Mira sin mei! Jeu sun in exquisit product da stenta e fadigia! Tuts han bials corps. Els fan sport, siuan, semuentan sco plemas e vesan era ora suenter il trenament top. Jeu zuppel mias panuglias e tilel en il venter.

Miu instructur ha la medema egliada sco la recepziunista. Igl ei ina egliada critica. Ina egliada che di: Matta, va e cumpra in outfit da sport contemporan, lu discurrin vinavon! El arva la bucca e damonda sch’jeu veigi gia fatg il ‚warm up’? Jeu mirel sin el sc’in tgutg ed el aschunta sch’jeu seigi gia stada sil crosser? En quei cass probablamein buc. El volva ils egls e meina mei tier in terment apparat. Per vegnir a cauld –  silmeins 15 minutas! Jeu dun il tgau. Cheu tschentas en il level e la spertadad. In sensor legia giu tia frequenza da puls. En 15 minutas vegnel puspei. Ok? El spetga buca sin mia risposta, lai mei a miez liug, persula cun quei animal d’in apparat.

Il plan
Suenter survegn jeu miu plan da trenament. Maschinas per la bratscha, maschinas per las combas, excercezis pil venter, pil dies, per la schuiala. Tut clar? Jeu dun il tgau da quei schenau, ughegiel buca da tschentar ina solia suletta damonda e mirel cun egls gross sin miu programm. Tut quei? En in’ura? Treis gadas à 15 repetiziuns? In terment cuolm avon mei. Jeu, persula cun auters en ina tschungla da maschinas ed apparats da fitness. Mon dieu! A mi maunca la colligiaziun cul divertiment, cul plascher! Fitness ei dira lavur! Ei dat glieud che numna fitness lur hobi. Hey, ussa dai buca gest si!, emprovel da semotivar! Quei va lu schon cul temps! Mo per oz hai avunda! Jeu mon sut la duscha e suenter ton pli spert en direcziun casa. Sebetter sin canpè e gaudel in toc tschugalata cun buna cunscienzia.

Cuntinuaziun suonda.

Text: A. Nay, http://www.annatinanay.ch/
Fotografia: pexels.com

Suonda LATABLA!

---

Dad Annatina Nay - Alternativ, melancolic e fin. Cun quels treis cavazins descriva la cantautura Ursina Giger sezza sia musica. Ella fagess mai musica da Heavy Metal e luvrass era mai sin banca. Sch'ella fuss buca daventada musicista, fuss ella oz forsa cuschiniera ni fotografa.

You Have My Heart – ti has miu cor
Igl onn 2017 ha prest entschiet. Ei vegn a daventar igl onn d’Ursina e sia band. Igl album da debut ei sin rucca e cumpara beinprest. En Romontschia ei la cantautura Ursina bein enconuschenta, el rest dalla Svizra e sil camp europeic forsa aunc buc ton. Quei vegn segir a semidar suenter ils 27 da schaner 2017. Entgins onns ein vargai dapi la publicaziun dallas EPs «Time Is A Thief» (2013) e «Hiding Behind A Mask» (2014). Sin nus spetgan diesch canzuns novas, duas romontschas ed otg englesas. Canzuns che raquentan a nus historias da novas entschattas, novas fasas dalla veta, da partenzas, da libertad e dall'affonza. La musica da «You Have My Heart» arva ina porta tier in mund profund – emoziunal e sentimental.

Ursina sezuppa buca pli davos ina mascra. Ella porscha a nus siu cor, mo admonescha en «You Have My Heart» da far adatg da quel – il cor seigi rumpeivels. Ina canzun cun in confess intim. Tgei historia schai davostier?
Davos «You Have My Heart» sezuppan differentas historias e buc mo las mias, mo oravontut era il dilemma: Mussar ni snegar sentiments? Quei ei era empau il fil tgietschen atras igl album. Mussar sentiments ei curaschus e curascha porta ins vinavon.

La musica sigl album niev ei melodiusa, electronica, forsa empau pli ritmica che la musica che nus enconuschin tochen ussa d’Ursina.
La musica ei propi carschida empau. Nus havein enrihiu ils arranschaments cun novas colurs e novs instruments. Ins auda tscheu e leu ina violina, differents suffladers ni synthisizers.

Tgei spetgas has ti enviers tiu niev album?
Jeu emprovel dad esser affon e da haver neginas spetgas.

Tgei munta per tei esser affon?
Esser affon munta per mei la habilitad da viver diltutafatg el mument, dad exprimer sentiments senza retenientschas, da sepiarder ell'atgna fantasia e dad esser libers da spetgas e squetsch da prestaziun.

Tgei caracterisescha tia musica?
Ina certa melaconia ed ina ferma affinitad per melodias e harmonias. Mintgaton giogel jeu era cun fuormas nunusitadas. «I'll fight for you» ha per exempel in refrain senza plaids ni «Question Untold» ha buc propi in refrain.

Tgi e tgei inspirescha tei musicalmein?
Mes amitgs ch'ein musicists, musica ch'jeu teidlel, la cantautura Feist.

Has tia ina canzun preferida sin tiu album niev e daco?
«Question Untold» ei ina da mias canzuns preferidas. Ella ha ina tempra ch'ei nova per mia musica cunquei ch'ell'ei pli sperta e pli ritmica che tschellas canzuns e tuttina va ella a prau.

Tgei nescha tier tia musica gl’emprem? La musica, il text?
Quei dependa dil mument ed ei buc adina tuttina. Per las canzuns dil niev album hai jeu savens improvisau al clavazin ed encuretg accords e melodias. Mintgaton hai jeu era in'idea per ina melodia ch'ei gia colligiada cun plaids. En gliez cas eis ei grev da sedistaccar da quels plaids. Els fuorman lu savens il coc ni il tema dalla canzun.

Tes texts ein ferms e van profund. Nua anflas ti tia inspiraziun?
Inspiraziun anflel jeu dapertut: en discuors, entupadas, ella natira, il mintgadi, novitads, cudischs ni films.

Con persunals ein quels?
In text ha adina ina tempra persunala, schiglioc havessel jeu probabel buc il desideri da scriver surdlunder. Quei vul denton buc dir che la historia dalla canzun ei mia historia.

«Love is a loosing game, if you’re not willing to play your part – love is a wasteland if you’re not able to give your heart». Con real!?
Carezia ei in dar e prender, schiglioc funcziuna ei buc. Pia fetg real.

La canzun «Behind Us» muenta en mei il sentiment d’encarschadetgna e partenza. Ursina, cun ragischs els cuolms meina dapresent ina veta plitost urbana. Co stat igl in en relaziun cun l’auter?
Jeu drovel omisdus. Els cuolms anflel jeu ruaus e quell'energia aschi unica ch'ins senta mo leu. L'energia dil marcau ei in'autra, mo era ina fetg fascinonta.

Sin turnea cun tia band vegnas ti era a sunar entgins concerts egl exteriur. Tgei munta la presenza sin tribu»nas internaziunalas per Ursina?
Quei munta in grond pass, biaras uras da viadi e semplamein ina nov'exeprientscha. Jeu sun spannegiada sin las reacziuns egl exteriur.

Il pli grond giavisch per Ursina e sia band ei da saver mirar anavos en 10 onns e dir ch'ella seigi adina stada autentica cun la musica ch'ella ha fatg. Perquei cusseglia ella als giuvens musicists che stattan avon la decisiun da metter tut sin la carta musica dad esser autentics, curaschus e crer en quei ch'els fan. Els duein buca dar si sch'ei va buca sco giavischau.

Text – Annatina Nay, www.annatinanay.ch
Fotografia – Angelika Annen, www.angelikaannen.ch

www.ursinamusic.com

.:. Tips: CD e video youtube:

NIEV VIDEO

NOVA CANZUN

EMPUSTAR GL’ALBUM

 

Suonda LATABLA! 

---

---