Hommage al teater sün via

Dad Anna Mengiardi -
Set acturas ed acturs, ün bussin, 30 preschantaziuns sün 29 plazzas cun circa 2501 visitaduors in 12 chantuns e quatter linguas düront duos mais. Quai es plü o main statta nossa turnea culla cumpagnia da teater Stradini la stà passada. Per mai l’ultima, pella cumpagnia la conferma chi sto ir inavant. Nos böt: inchantar e far glüschir ils ögls a grond e pitschen. Nos messagi: sömis sun realisabels, curaschi!

La cumpagnia

Avant trais ons s’han missas insembel ses persunas per crear ün toc teater sün via cun ün bussin. Infra duos mais vaina striunà our dal ajer ün toc teater – Spazzacammino - procurà custüms, fabrichà las culissas, organisà üna turnea e fat reclama. Tuot pel sömi da crear our d’aignas forzas ün teater chi trattegna e derasa magia. Intant piglaina temp var 10 mais per tuot quella lavur... no savain intant che cha no fain e cha tuot voul seis temp. La qualità da nossa lavur es ceschüda cun experimentar ed ans imprendont a cugnuoscher uschè bain cha no savain disferenzchar nos stinfs a man da lur odur. Minchün sa co cha tschel funcziuna e che ch’el sa far il meglder. Las fermezzas da minchün vegnan missas i’l center tant i’l teater sco illa lavur davo las culissas. Ma ingün da no nu s’occuppa tuot on be dal proget Stradini. No eschan eir pedagogs da circus, musicants, acturs in oters progets, magisters, vendaders o students da ritmica. In mincha cas, chi chi voul esser actur pro Stradini sto far quint da’s partecipar ill’organisaziun dal proget. Dal scriver l’istorgia fin ill’organisaziun da la turnea, comunicaziun, publicaziun, procuraziun da custüms, concept, ingaschamaint da reschia e creaziun dal logo. Cur chi nascha üna nouva pitscha interpraisa esa da far economia. In quel rom nun ha ingün da no ne bacholor ne master...

Teater sün via

Noss’ idea es da manar il teater in regiuns ingio ch’el nun es tant rapreschantà. Teater sün plazzas da cumün chi plascha a minchün. Cumedgia inspirada da la commedia dell’arte in ün möd adattà per uffants cun ün bun sich seriusità. Uschè vaina tschernü la fuorma da la tarabla e vain agiunt figüras tuottafat extravagantas, exegeradas e fantasticas. Mincha seriusità vain bod o tard interruotta dad üna risada e sco decoraziun imbellina nos toc „Lillith“ cun chant, musica, acrobatica ed aristica. In quista maniera ans esa gratià da fascinar ad uffants aint illa charozza, lur fradgliuns chi van a scoulina ed a scoula, a lur genituors, a nonas e bazegners.

Grazia fitg a tut ils sponsurs da LATABLA:

  • www.belain.ch
    www.belain.ch
  • Tel. 081 864 01 51
    Tel. 081 864 01 51
  • Adüna bun - cafè grischun
    Adüna bun - cafè grischun
  • www.quartalingua.ch
    www.quartalingua.ch


Sün via po gnir minchün a verer il spectacul. Qua s’inscuntra vi pel di la glieud chi sezza la saira aint il publicum. Qua eschna sco acturs uschè dastrusch al publicum sco inglur oter. E no eschan là ingio cha la vita capita. Là suna eir minchatant sain da not, passa ün tractor o üna scossa vachas davo il palc via e Mengia clomma a Clà da gnir a tschaina intant cha la Deessa dal mar chanta sia chanzun. E qua o là plouva simplaimaing tuot quai chi po. Sül palc aint illa „black-box“ füssna protets da tuot quellas emissiuns. Ma sün ingün palc dal muond nu vessna ragiunt a tanta glieud. Pajà vegna pro no pür a la fin e minchün po dar quai ch’el es bun da dar. Cha no vain nos predsch, quai faina savair cler e net. Ma uschè dà ün 20, il prossem 50 ed ün forsa 10 o tschinch francs. A la fin va sü il quint. E no vain buna conscienza ch’ingün nu s’inrücla per seis raps.

La turnea

No vain cumanzà nos gir principi da lügl a chasa i’l Bernais, vain cuntinuà vers nord davo il Rhein al cunfin da la Germania, fermativa a Turich, lura vers Nord-Ost i’ls chantuns St. Galla ed Appenzell. Da là davent es’i in Grischun in Engiadina Bassa, Engiadin’Ota, Müstair e Bergiaglia, giò vers il süd i’l Tessin e da qui sü tras il San Bernardino illa Svizra Interna. L’ultima storta vaina fat eir amo pro’ls francofons illa Romandia e da là davent darcheu a chasa ad Ins tanter ils chomps da verdüra. No vain dimena visità tuottas quatter regiuns linguisticas e – sco gronda sfida – mincha jada adattà il toc illa lingua regiunala. Eu nu cugnuosch ün möd plü bel per imprender a cugnuoscher la Svizra. Quatter dis lavur, trais vacanzas e darcheu da prüma. In mincha lö chi’s riva as vegna in contact culla glieud dal lö e la mentalità da mincha cumün as spievlescha aint illas reacziuns dal publicum. Lais, flüms, auals o bügls per siglir laint as rinfras-char sun davo mincha storta e mangiar...mangiar as mangia il plü bain in Engiadina! O in Ticino? Las tuortas d’eiran las megldras quellas da l’Appenzell. Ma la tschaina libanesa a Turich d’eira squisita.

Meis guadogn

Aint illa buorsa nun es ingün da no gnü rich. Schabain cha no vaivan tuots fomatschas sco uors davo avair giovà - eu dschess cha no vivain per ruduond 53% da l’applaus. E sün via dal privileg da pudair verer a nos publicum in fatscha, sà cha no nun eschan orbantats da reflecturs da glüm. Las murlunas dals uffants chi noudan plainamaing i’l muond da l’istorgia, e las tscheras persas dals creschüts chi invlidan cha eir no tils vezzain am dan il sentimaint da crear magia. E cur cha l’applaus clingia glüschan cours in ün barat vicendaivel. I seguan cumplimaints dals gronds in fuorma da pleds e dals pitschens fond amo adüna murlunas. „Grazcha, per ans imbellir il di!“

Che bel manster! Da meis perdavants n’haja impraisil proverbi: „Cull’art e cul ingion as viva be mez on – ma, cull’art e cul manster as viva l’on inter.“ ...E scha l’art dvainta manster? Lura saraja be da star al tibo da nu far ingion.

Daplü infuormaziuns suot www.stradini.ch


Text: A. Mengiardi
Fotografia: www.stradini.ch 

FA PART, commentescha sutvart! 

+++ Il spiert da cuminanza è important ed uschia è mintgin bainvegni da sviluppar quist project cun nus; Igl è pussaivel da registrar events e nus publitgain Vossas novitads. Scha vus avais gust da contribuir in artitgel ans pudais trametter in e-mail sin This email address is being protected from spambots. You need JavaScript enabled to view it.

Forsa er insatge per Vus:

Dar ina nota a questa contribuziun
(2 vuschs)
Anna Mengiardi

Autura LATABLA, october 2016 - Anna Mengiardi, oriunda dad Ardez, viva ad Ins i'l chantun da Berna. La stà è'la in turnea culla cumpagnia da teater Stradini e dürant il rest da l'on dà'la scoula, as partecipescha a differents progets o viagia pel muond intuorn.

Newsletter:

Adressa d'email:

Prenum:

Num:


POPULAR IN QUESTA CATEGORIA:

5 giadas fitg fraid

14 da favrer 2018

Da Silvana Derungs (DRG) –  La lingua rumantscha è ritga, uschè ritga che nus pudessan atgnamain ans servir pli savens da sias bellezzas e ritgezzas – e da tut sias...

5 bellas dunnas

16 da matg 2018

Da Silvana Derungs (DRG) –  La lingua rumantscha è ritga – uschè ritga che nus pudessan atgnamain ans servir pli savens da sias bellezzas e ritgezzas. Per exempel datti bels prenums, nizzaivels betg mo...

5 bellas chauras

10 da schaner 2018

Da Silvana Derungs (DRG) – La lingua rumantscha è ritga – uschè ritga che nus pudessan atgnamain ans servir pli savens da sias bellezzas e ritgezzas. Oz datti tschintg bellas...

La columna - Chi chi nu tschercha chatta

28 da november 2017

Da Fadrina Hofmann - L’uman es ün chatschader e ramassader. La cumprouva n’haja a chasa in fuorma da duos uffants chi chattan roba da tour e mütschir. Ün insaj? Voilà...

La columna - sex sells

23 da mars 2017

Da Fadrina Hofmann - Sex, acts criminals e catastrofas - quai sun ils temas chi’s vendan statisticamaing il plü bain in gazetta. Schi’s lavura davent da l’Engiadina dvainta plü difficil...

Cult corporal sco nova religiun

24 da settember 2016

Da Rest Giacun Dermont - La religiun da noss temp è la moda. Ella dictescha co che l’uman ha da’s cuntegnair, tge ch’el traffica en ses temp liber e perfin...

Banadida telefomania

21 da favrer 2018

Da Fadrina Hofmann - Chi nu cugnuoscha il mumaint da schoc scha’l telefonin es dandettamaing davent? Ed il sentimaint surleivgià cur ch’el cumpara darcheu? Il telefonin es dvanta nos cumpogn...

Sch’il destin ei casuals – ni la casualitad destin

30 da matg 2018

Dad Annatina Nay - Mintgaton s’imaginel ina creatira che sesa vid ina meisa da lavur. Sin quella meisa ha ei nundumbreivel biars pupials cun notizas e cartas geograficas, forsa in giug...

Go to top