increase font size 
Da Rest Giacun Dermont -
La religiun da noss temp è la moda. Ella dictescha co che l’uman ha da’s cuntegnair, tge ch’el traffica en ses temp liber e perfin che ch’el mangia. Mancan a la giuventetgna autras perspectivas?
Sa nutrir a moda vegana, passentar uras ed uras a guaffens da trenament en tempels da fitness, dumbrar calorias e quintar idrats carbonics - quai èn tut novs aspects da la giuventetgna d’ozendi. Musclas e forza valan tar ils giuvens sco simbol da status, tar las giuvnas era il regl da vulair esser uschè magras sco pussaivel. La giuventetgna celebrescha il cult corporal sco religiun da substiziun al cult divin. Adina novs centers da fitness avran lur portas e chattan grond resun tar la giuventetgna. Lur idols chattan els en la televisiun ed en l’internet.
Heidi Klum e Social Media
Ils idols per ils giuvenils porschan emissiuns sco tala da Heidi Klum, che tschercha on per on novas giuvnas per la moda. Giuvnas dunnas cun corps da modell sa preschentan al public e fan da tuttas sorts per avair lur quart d’ura da prominenza. Il messadi davos questas emissiuns è il fatal da quest cunfar: Mintgin po brigliar en quest metier, sch’el è be pront da lavurar dir avunda.
La realitad è dentant in’autra.
Be ina pitschna part da l’umanità ha insumma las premissas necessarias per in corp da model. En l’internet, ch’è daditg la funtauna d’infurmaziun preferida da la giuventetgna, curseschan millis e millis maletgs da corps giuvens perfetgs. I vegn suggerà a la giuventetgna che be ils bels e trenads possian avair ina vita cuntenta. Tgi che cunterfà a la norma vegn bittà a chantun e ris ora.
Grazia fitg a tut ils sponsurs da LATABLA:
Dumbrar calorias
Sa nutrir a moda „sauna“ è en moda. Ina gronda part da la giuventetgna metta grond pais sin lur nutriment. Ils ins desistan forsa da products d’animals per motivs ecologics u perquai ch’els aman ils animals. Auters dentant sviluppan disturbis da nutriment che pon as sviluppar a malatias cun enormas consequenzas fisicas e psicicas. Dapi entgins ons registreschan communitads che s’engaschan per persunas cun disturbis da mangiar in augment da persunas pertutgadas. Bulimia e anorexia èn malatias ordvart malignas perquai ch’ellas vegnan vesaivlas pir en in stadi già precar. Ils donns corporals chaschunats causads da disturbis da nutriment èn considerabels.
Già survargan ils custs medicinals per persunas cun bulimia ed anorexia tals che vegnan chaschunads da persunas adiposas. Entras ils cult dal corp emblida in part dals umans da viver lur giuventetgna. Minchin vul sa preschentar en la megliera glisch e dà grond pais a la preschentaziun da sasez en l’internet. Tut ils auters aspects da vita da mintgadi perdan impurtanza.
Che schabegia cun ils teaters?
Ils giuvens èn pronts da pajar autas contribuziuns annualas en tempels da fitness, da dar ora lur raps per preparats da nutriment e pulvras da protein. Ma chi posseda in abonnement stagiunal per il teater? L’individualissem da nos temp maina ad in svilup alarmant. Davart las premissas essenzialas per nossa vita da mintgadi na vegn betg pli discutà. Libertad e bainstanza n’èn dentant betg garantidas per l’eternitad, ma ston vegnir defendidas di per di. Il svilup politic en Svizra, en l’Europa ed en ils Stadis Unids da l’America sa distatgescha adina pli ferm da sias ragischs. Uschia sa sviluppa ina società apolitica e pauc critica. Il quint ans preschenta cun il renaschiment da forzas populisticas e naziunalisticas, entras discreditar l’idea d’ina Europa unida e cun pajass sco candidats per ils pli impurtants uffizis da quest mund. Mincha pievel obtegna la regenza ch’el merita.
Text: G. Dermont, Cuira
Fotografia: www.pixabay.com
►FA PART, commentescha sutvart!+++ Il spiert da cuminanza è important ed uschia è mintgin bainvegni da sviluppar quist project cun nus; Igl è pussaivel da registrar events e nus publitgain Vossas novitads. Scha vus avais gust da contribuir in artitgel ans pudais trametter in e-mail sin This email address is being protected from spambots. You need JavaScript enabled to view it. |
Autur LATABLA avust e settember 2016 - naschì e creschì si a Laax en Surselva, scolas e studis a Cuira, Milaun, Turitg e Friburg. Stà en set onns main che quindesch dis ad alp. Ama la mar e la cuschina taliana.
