Da Mario Pacchioli - Igl ei marvegl avon che di a San Verdi. Dottor Benino arva ils barcuns da sia combra e respira l’aria frestga da quella freida damaun da fevrer. Sco in ritual matutin salida el cun ina pintga reverenza la miraglia cotschna dalla casa bandunada vieifer sia finiastra. Siu egl scarsola dalla spunda giu e seschluetta tras las streglias dil vitg nua che tut schai aunc ruasseivlamein ella bratscha da Morfeo daferton che las aururs recameschan ladinamein en aur las tschemas dalla pezza. Cun ina certa tenerezia contempla Dottor Benino las casadas verdas che protegian dapi decennis lur habitonts dallas burascas dil temps, e buca senz’ina certa nostalgia munta si’egliada la senda che meina dil vitg entasi viers sia casa. Sco beinsavens sepusa el encunter il finistrel, siara ils egls e selai empalar dil nunstunclenteivel tschallatar dil dutg che nescha gest sut sia finiastra...

Avon biabein sissont’onns fuva Benedetto Benino arrivaus per l’emprema ga a San Verdi, auncallura sco giuven student da chemia. Ei fuva vegniu ad ureglia ad el che l’aua dil dutg da San Verdi gaudi in bien renum e che sias qualitads vivificontas, enconuschentas dalunsch e damaneivel, seigien nuncontestablas. Per sia pli emprema lavur da studi veva Benedetto lu decidiu da serender a San Verdi per analisar l’aua da quei dutg ton appreziau.

Ils pli vegls seregordan aunc bein dil giuvenaster che fuva arrivaus in cauld miezdi d’uost silla plazza fontauna. Siu pass fuva francs. Ses cavels ners sco la cotgla. E permiez sia cuppa-tgau paradava ina spartida alva, stergliada cun ina generusa purziun brigliantina che deva ina remarcabla tarlischur a quella bera nera. Schegie che ses calzers eran purlus ed isai revelava siu vestgiu ina fina derivonza. El maun seniester purtava il mat ina valischa da curom brin, en siu dretg teneva el ina brev, marcada cun in sigil dad in’instanza ufficiala. Cun in accent sicilian veva el dumandau schebein ins savessi menar el tier il cauvitg. Entgins dis pli tard veva la curella spluntau vid mintg’esch-casa ed aschia tut ch’enconuscheva igl ensenn dil giuven Sicilian che veva priu dimora ella casa d’albiert tier la Signora Maria Pia.

Mintga damaun tschernev’ins el silla senda sur vitg muntond la via encunter la fontauna dil dutg, adina cun sia valischa brina enta maun. Sileu passentava el igl entir di fagend da tuttas sorts emprovas e controllas, handergiond  cun bubrolas e fraclas e mischedond puorlas e liquids da tuttas colurs. Mava enzatgi sper el vi salidava el adina curteseivlamein. Mussava enzatgi interess per sia lavur deva el bugen plaid e fatg. Aschia fuva igl amureivel giuven beinprest stimaus da tuts, e sch’ins vess buca saviu auter, vess mintgin sincerau che Benedetto Benino seigi in convischin da San Verdi.

En in hedai era las jamnas vargadas. La lavur da studi era terminada ed il di da partenza arrivaus. Igl entir vitg fuva serimnaus sin plazza fontauna per prender cumiau. Las mummas devan pietigot a Benedetto il fegl, Ils babs serravan il maun a Benedetto il schiender, las giuvnas devan adia a Benedetto il carezau ed ils affons a Benedetto, lur frar grond. Avon ch’el semetti sin via, era el aunc inagada semenaus, veva exprimiu siu sentiment d’engrazieivladad ed empermess dad in bi di puspei turnar a San Verdi ! Cun quels plaids veva el priu la via sut il speis...

Plaunsiu arva Dottor Benino ils egls. Con ditg ch’el ha sventulau per sias regurdientschas entuorn sa el buca. El scrola il tgau, siara la finiastra e serenda giun cuschina nua ch’el vegn beneventaus da siu tgaun „Fidelio“ cun in empreneivel giappem. Dapi biars onns ei il Spinone Italiano siu fideivel cumpogn da viadi e - sche Dottor Benino concedess - ina dallas sulettas creatiras dallas qualas el sefida tschoccamein. Beinsavend tgei ch’il tahegiem da siu cumpogn da quater teplis munti, arva el la frestgera e pren neuadora in taglier cun si in brav ies, la davosa perdetga dil gigot dalla dumengia vargada. Cun tutta satisfacziun rui il tgaun vid siu ies daferton che Dottor Benino metta sia ceffetiera sin platta. Cheu splunta ei vid igl esch-casa! (la cuntinuaziun suonda)

Text e fotografia: Mario Pacchioli

Follow us:

---

---