Corina Gustin

Corina Gustin

Fundatura ed autura - creschüda sü a Tschlin in Engiadina Bassa. Davo la finischiun da la HTF a Cuoira ha'la lavurà 6 ons i'l marketing pro ün'agentura da viadis. Daspö il 2007 ingaschada sco assistenta pro üna banca.

Da Corina Gustin - Fingià da mat d'eira Roland fascinà da gronds musicists e sömgiaiva da dvantar eir el ün dad els. Intant viva el seis sömi. Sco part masculina dal duo me+marie es el sün granda turnea in tuot l'Europa. Quista stà tils chattaina sül line-up da festivals prominents sco il Great Escape Festival, Nova Rock, Haldern Pop, Blue Balls Festival o l'Open Air Lumnezia. Tanter concerts e la producziun da nouv material per il seguond album ha el gnü temp da tavellar cun no.

 
Chi es Roland Scandella?

Eu o, meis nom d'artist pro Me+Marie. Mia tatta d'eira üna Scandella uschè chi resta in famiglia. Id es intressant che cha quel nom chaschuna pro glieud chi'm cugnuoscha. La fin finala han blers artists (Sophie Hunger, Eddie Vedder, Tina Turner, Elton John) ün nom d'artist. Schico? Id es üna protecziun - e la fin as divra per mai ün nouv muond - eu sun Roland Scandella - eu sun artist e la musica am da la libertà dad esser chi e che ch'eu less. 


S'ha el müdà daspö la "fin" da las bands Nau ed Andarojo?

Eu craj cha "svilupà" es il dret pled. La vita es svilup, stagnaziun nu'm plascha. Quai nu voul dir ch'eu nu fetsch mai la posa o ch'eu less adüna daplü. Müdamaint es important. Andarojo d'eira üna band. No vain fat üna pruna ed ans vain svilupà. In t'üna jada, davò blers müdamaints, eschan gnüts a la conclusiun chi füss bun scha minchün jess l'aigna via. Uschè esa stat - insè esa sco pro üna relaziun tanter duas persunas - in t'üna jada nu s'haja plü bler da dir. E lura esa da decider co chi va inavant. La musica e las regordanzas restan. Our dad Andarojo vaina fundà NAU. E NAU daja amo adüna. No vain registrà ün nouv album chi cumpara quist on. No sunain als 5 avuost a las 20:15 al Open Air Malans.


Pel mumaint esch tü sün turnea gronda in Europa cun "me+marie". Co quarda oura cun l’increschantüm?

Esser sün turnea ha üna magia fich aigna. Il prüm üna jada as stoja esser gugent per via. Quai es fich stantus. Per part esch simplamaing 9 uras aint il auto. E quai lura ün mais l'inlunga 100 concerts l'on, ün di l'eivna liber ed uschigliö aint il bus, arriv, fabrichar sü, soundcheck, mangiar, spettar chi cumainza, plaina concentraziun, concert, fini, vender albums, discuorrer culla glieud, fabrichar jo, e la fin a cuz in ün hotel. Düra lavur es quai. I nu resta bler temp da far festa, sco quai chi vegn adüna dit sur da bands. Il bel landervia es ch'eu poss far precis quai ch'eu leiv far fingià daspö ch'eu m'algord. E hai precis, increschantüm. Eu am lasch adüna increscher per l'Engiadina!


Che concert es stat il plü dischagreabel sün quista tour e perchè? Che es stat il plü grond mumaint per tai persunalmaing?

Mincha saira es importanta. No eschan cun noss prüm album sün nossa prüma turnea. No investin tuot nos temp e tuot noss raps in Me+Marie. I nun es uschè ch'eu gudogn pel mumaint raps cun quai ch'eu fetsch. Id es üna investiziun. Id es sco pro ün falegnam chi fabricha sü sia buda, il prüm ha'l be cuosts. Uschè es quai eir pro Me+Marie. Il bun es cha no pudain sunar uschè bler causa cha noss’ agentura craja vi da no e da «vollgas». Las premissas sun dattas, la glieud less verer e dodir a no. Uschè pudaina fabrichar inavant - sco'l falegnam. Ün mumaint propa magic d'eira a sunar l'on passà sco pregruppa da Herbert Grönemeyer a München sül Königsplatz davant 18'000 persunas. Quella algordanza nu'm po tour plü ingün...


Es l'esser davent da la patria inspirativ?

Mo, eu less dir cha il plü creativ suna a chasa in Engiadina. Id es bel da verer differents pajais ed imprender a cugnuoscher glieud. Uschè possa implir mia buscha cun bleras impreschiuns chi inrichischan mia vita e mia musica. Inspiraziun capita, i nu's sa mai cura.

Grazia fitg a tut ils sponsurs da LATABLA:

  • Tel. 081 864 01 51
    Tel. 081 864 01 51
  • Adüna bun - cafè grischun
    Adüna bun - cafè grischun
  • www.quartalingua.ch
    www.quartalingua.ch
  • L’Institut dal Dicziunari Rumantsch Grischun
    L’Institut dal Dicziunari Rumantsch Grischun
  • Shop online!
    Shop online!
  • La Giuventetgna Rumantscha
    La Giuventetgna Rumantscha
  • Tel. 081 864 15 81
    Tel. 081 864 15 81
  • www.belain.ch
    www.belain.ch
  • Tel: 081 852 45 45
    Tel: 081 852 45 45


Plü bod vaivast ün job da büro, d'eirast redactur da musica. At manca minchatant la rutina dal minchadi?


Na! Eu nu leiv mai alch oter sco esser cun üna band sün turnea e viver da la musica. Eu sun fich grat per quai ch'eu n'ha e dal rest vegn la rutina eir sün turnea.


Co esa gnü a quista combinaziun cun Maria?

Eu n'ha lavurà pro'l Radio Rumantsch sco redactur da musica. Maria es gnüda cun sia band Ganes dasperavia per promover lur nouv album. A mai ha plaschü che ch'ellas fan. Ün temp plü tard ans vaina darcheu inscuntrà al Chapella Open Air, ingio ch'ellas han sunà ün concert. Da quel temp scrivaiv'eu chanzuns per meis project da solo Cha da Fö. Eu n'ha lura simplamaing dumandà a Maria sch'ella nu vess interess da chantar sün quel album. Uschè s'ha dat tuot pass a pass. 


Vos album "one-eyed-love" es rivà sülla plaza 82 dals charts svizers avant ca. ün on. Vain bainbod ün hit per la prüma plazza?


Sch'eu taidl che musica ch'id es aint il charts, o musica chi va aint il radio, schi'm vegnan bod las larmas. Eu vegn grit! Cun quella musica nu possa cumanzar nüglia. La clav per no es da sunar e sunar e sunar ed uschè ragiundscher noss auditurs. Vi da la blera musica chi splacha aint ils charts nu s'algorda davo ün on ingün plü. Schi stess esser uschè cha no splatain nan ün bel di ün hit schi lura dess quel esser "nossa" musica e nà alch construi pels charts.


La single "one-eyed-love" as tratta dad ün'amur persa…crajast vi da la forza da l'amur? Che as pudessa far per na rivar i'lla situaziun descritta in questa chanzun, hast ün'idea?

Amur es il plü important. One Eyed Love es insè fich politic. I nu basta scha be ün dà amur e tschel nà. I sto gnir da tuottas duas varts lura pudaina crear alch chi ha dürada.


Forsa er insatge per Vus:

  • 5 giadas ir ad in ir
    5 giadas ir ad in ir
    Da Silvana Derungs (DRG) – La lingua rumantscha è ritga. Quai savain nus sa chapescha. Ma mintgatant essan nus tuttina…
  • Engiadina, terra fina
    Engiadina, terra fina
    Da Fadrina Hofmann - Stà, temp da vacanzas, e tuot la Svizra para dad esser güsta in Engiadina. Inclegiantaivel, id…
  • 5 fritgs fauss
    5 fritgs fauss
    Da Silvana Derungs (DRG) – La lingua rumantscha è ritga. Quai savain nus ussa bain avunda. Quest mais – amez…
  • 5 giadas in chazzer cunfar
    5 giadas in chazzer cunfar
    Da Silvana Derungs (DRG) – La lingua rumantscha è ritga. Quai savain nus ussa bain avunda. Ils ultims mais avain…

Tü hast üna jada dit cha'l rumantsch saja l'unica lingua cha tü saintast. Cun la band "me+marie" chantast tü inglais…

Schi quai es uschè, quai es mia lingua da la mamma. Chantar inglais es però plü simpel, id es per mai la lingua da la musica da blues, pop e rock. I tuna svelt plü bain o dit cun oters pleds i tuna plü cuntschaint. Eu chant fich jent per inglais però badair bada rumantsch amo bler plü profuond, e quai nun es "be" simpel! La lingua es co ün instrumaint e minchatant vola simplamaing ün oter instrumaint.


Tü vivast a München, dalöntsch davent dal rumantsch?

Schi,  a München e S-charl. In cità suna be per lavurar, sch'eu n'ha liber svanischa be subit e vegn a chasa in Engiadina. La cità nun es meis lö predilet. Eu douvr la quietezza, las muntognas, mia famiglia ed aua forta ;)


Che bands taidlast tü svessa? Hast tips per nus?

Eu taidl pac musica, e scha lura consciaint. Eu nu poss jo quist speraprò, per quai am vaglia la musica massa bler. Eu cumpr per gronda part LP's e jod il tadlar musica. Eu sun creschü sü uschè. Eu jod musica uschè sco cha oters jodan vacanzas. Pel mumaint taidla la nouva platta da Feist. Eu taidl jent LOW. Ün artist ch'eu predsch fich es Bon Iver o Noel Gallagher. Ed eu taidl jent vegl blues da Muddy Waters. E vairamaing n'haja üna fasa ch'eu taidl bler Rolling Stones, il lustig es cha quella "fasa" tegna fingià var 3 ons.


Che fast scha tü nu fast musica?

Lura suna vairamaing adüna dadourvart aint illa natüra. Istess ingio ch'eu sun, eu observesch gugent bes-chas. Quai sa esser ün corv in üna cità o ün tschiervi aint in S-charl. A mai fascinescha quai. Eu sun chatschader cun cour ed orma. Eu nu maing otra charn sco sulvaschina, exceptuà sch'eu vegn invidà aint. Cuschinar es eir alch ch'eu fetsch jent. Sezzer insembel cun buna glieud, mangiar alch bun e baiver alchet, schnorrar, quai es alch bel.


Es il far musica forsa eir üna distracziun da tuot ils "problems" chi'ns vegnan preschantats illas gazettas? Putin, Trump, fügia e guerras…

Na! Eu pretend ch'id es precis il viceversa. Tuot las emoziuns chi's bada da las robas chi capitan minchadi sül muond sun emoziuns chi splachan aint la musica. La musica es üna sort filter, ün centrum dad elavuraziun. Quai chi vegn oura es lura precis quai chi fa bain o üna resposta sün las dumondas cha la vita fa.


Hast temp da lavurar vi da nouvs progets ed hast plans da far alch solo? Blues e Ghittaras?

Nau ha registrà ün nouv album chi cumpara quist on. Eu n'ha scrit var 10 chanzuns per meis project solo Cha da Fö ma nun ha amo il desideri da registrar quai. Ma quai vegn ;) Pel mumaint suna vi dad üna collavuraziunina. Ma sur da quai nu lessa dir daplü. Tuot mi'energia va aint la musica da Me+Marie. Uschè chi'm resta pac temp da far amo daplü.   E sch'eu n'ha temp lessa imprender ad ir a sella. Chavagls am fascineschan.


Che es teis böt e sün che pudaina ans allegrar ils prossems ons?

Böts n'haja schi. Cuntantezza e sandà lura va tuot sco da sai. Lain verer ;)


Text: Corina Gustin / Roland Scandella
Fotografia: (c) Chris Gonz
Dapli: http://meandmarie.com/

Proxims concerts:

24.06.2017, Bad Ragaz
20.07.2017, Konstanz (GER)
21.07.2017, Val Lumnezia
28.07.2017, Lucerna
29.07.2017, Oberammergau (GER)
04.08.2017, Beerfelden (GER)
11.08.2017, Haldern (GER) 18.08.2017, Trier (GER)


Medias sozialas:

youtube
facebook


Tips:
One Eyed Love
You don't know
Where's your soul?


Suonda LATABLA! 



Da Corina Gustin - No sezzain cullas chommas in crusch ed ils ögls serrats süllas mataratschas da gummi chi sun rasadas oura cun chüra e precisiun sül fuond da lain. Maister Yu illa mittà davant no cun seis bel costüm da saida gelga. Cuntuot cha sia fatscha nun es nüglia d'extraordinari es ella fich interessanta cun trats serius e quiets. Seis schnuz elegant penda bain disziplinà sper la bocca gio e til fa gnir amo plü seirus. El para dad esser totalmaing concentrà, uschè sco chi tocca. 


 

  • bainesser-tschlin-stueva.JPG
  • bainesser-tschlin-tai-chi.JPG
  • bainesser-tschlin-sala-mangiar.jpg
  • bainesser-tschlin-recepziun.JPG
  • Bainesser_Yoga.JPG
  • Bainesser_TaiChi.JPG
  • bainesser-tschlin-stanza.JPG


Coura esa amo s-chüra not ma plü probabel na plü lönch perche ils utschels sun dandetta eir sdruogliats e tschüblan melodias da prümavaira. Alch cula gio dal tet da la sala da gimnastica chi’s vezza fingià da dalöntsch davent pervi da sia culur cotschna. Curius, naiv nun esa fingià lönch na plü. Eu saint mincha muscla da meis corp, daffata suot il culöz esa musclas, chi vess cret? Hai, quai capita schi’s es gliedra sco üna muntanella tuot inviern e’s va lura ad üna fin d’eivna intensiva da Tai Chi e Yoga.  

Schaniant per il corp cun ün simpel böt fisico-spiritual

Ingio saran las duos giuvnas chi mancan amo adüna? Vairamaing füssa da's focussar sün sia respiraziun e na’s laschar distrar dad impissamaints. «Ils impissamaints sun sco crötschs chi vegnan, raintan aint ferm e prouvan dan’s manar dalöntsch davent in ün oter lö… » vaiva dit Katharina dürant üna da las lecziuns da Yoga her davomezdi. Ella ha complettamaing radschun. Eu prouv da’m deliberar da las canaglias e gnir inavo in sala. Quai nu'm grataja inandret, eu sun uossa rivada a Bali.  

Avant circa precis trais ons d'eira svolada sün quella bell' isla in Indonesia per imprender a surfar, na per far yoga. Insè nu vaiva bler incletta per glieud chi fantas-chaiva per quist' actività. Hippies chi mai nu lavuressan per üna banca, da quels chi sezzan intuorn ün fö e chantan, alternativs e softies faivan yoga. I'm gniva adimaint büschmainta da glin chi savura da "Raucherstäbli", bastunins d'intschais per rumantsch. Mia prüma lecziun da Yoga d'eira però cumplettamaing differenta da quai ch'eu vaiva aspettà. Davant mai sezzaiva ün hom à-la-mode fich musculus cun tattoos sü e gio da la bratscha ed üna bella frisur moderna. Ingüns rastas, ingünas chotschas da glin culuridas, ingüna savur da "Räucherstäblis" ed ingünas soccas da lana.  

Ün spiert san in ün corp san

Üna malincletta totala. Yoga es bler daplü sco cruschar las chommas e serrar ils ögls. Yoga nun es ün passatemp dimpersè  ün sport per minchün. Posiziuns (asanas) sco "il guerrier"  o la plü cuntschainta, il "chan-chi-guarda-aval" fan süar, douvran forza, cundiziun, controlla e conzentraziun.  

Sco il Yoga es eir il Tai Chi üna fuorma dad exerzicis meditativs chi sun characterisads da movimaints plans ed ün stender in posiziuns da balantscha corporala. Ün sport our da la categoria "low impact", voul dir ün' actività schanianta per il corp cun ün simpel böt fisico-spiritual; da redüer il stress e ragiundscher üna sandà totala davo la devisa "ün spiert san in ün corp san”.

Eu tuorn uossa però inavo in sala perche minchatant esa istess da rivir ils ögls e splintrar via pro'l maister. Quel fa avant ed ils scolars fan davo e quai sainza perder blers pleds. Verer ed imprender es la devisa, precis sco illas scoulas da Shaolin in China. Maister Yu ha amo adüna serrà ils ögls e sezza davant no sainza far bau.  

Eu improuv da chattar mia mità.  

Da dalöntsch davent as doda co cha las duos damas cun retard galoppan tras il corridor. D’uffants cuorrivan no plütöst in tschella direcziun. Inoura, in direcziun da las tualettas chi’s rechattan aint i’lla chasa da scoula da tschella vard. Amo plü bod, avant 25 ans faiv’na gimnastica aint illa sala pitschna in chasa da scoula. Là ingio cha hoz as rechatta la sala da mangiar. Bellas maisas grondas da lain massiv invidan a püschain, giantar e tschaina. Quellas vaiv’na rablà in sala be cun bleras fadias  - üna roba da millimeters saja quai stat, aint da fanestra e quai be cun agüd da ses homens ferms - ha quintà Corsin chi ha renovà e drizzà aint la chasa da scoula veglia da Tschlin e transfuormà ella complettamaing.   

Grazia fitg a tut ils sponsurs da LATABLA:

  • www.belain.ch
    www.belain.ch
  • Adüna bun - cafè grischun
    Adüna bun - cafè grischun
  • L’Institut dal Dicziunari Rumantsch Grischun
    L’Institut dal Dicziunari Rumantsch Grischun
  • www.quartalingua.ch
    www.quartalingua.ch
  • Tel: 081 852 45 45
    Tel: 081 852 45 45
  • La Giuventetgna Rumantscha
    La Giuventetgna Rumantscha
  • Tel. 081 864 01 51
    Tel. 081 864 01 51
  • Shop online!
    Shop online!
  • Tel. 081 864 15 81
    Tel. 081 864 15 81


Ingio chi's chattaiva la gardaroba cun tuot las giaccas e putschas spüzzulentas dad uffants da prüma fin sesavla classa dà hoz bivgnaint la recepziun eleganta dal Center da Bainesser. Eu m’allgord cha ün o l’oter laschaiva là tuot on pattins, chaplinas, schaniaders, pucks, bastuns ed oter material ramassà chi nu pudaiva fingià quella jada na mancar pro'l sport popular dals mats engiadinais. Vi da pattins abandunats e pantofflas nun algorda nüglia plü, i savura da nouv e dal fuond da lain da la stüvetta daspera chi invida a passantar sairas pachifigas cun oters participants.

A las set e mezza daja püschain

Ils vainters sbarbuoglian ün davo tschel sco ün'uonda tras la sala gronda e meis impissamaints penduleschan tanter Master Yu ed il püschain. In cira ün’ura ed ün quart daja alch da ruojer. Hai, a las set e mezza.  

Davo avair mangià vaja inavant cun trais uras da Tai Chi. Tanteraint daja üna variaziun chi'd es bainvgnüda, il maister Liu ans invida spontanmaing ad üna lecziun da Qi Gong. El es quel giuven da 28 ons chi’s vezza a spassegiar sü e gio per las giassas da cumün e's inscuntra minchatant dafatta illa butietta. El ha gust da giovar a ballapè culs uffants e salüda a minchün cun ün amiaivel «chau». Dürant il Qi Gong tadlaina musica tradiziunala chinaisa our dal telefonin da maister Liu. Las melodias sun simplas e’s repetan ad ün repeter. Ellas mainan a mai darcheu in oters muonds lontans. I füss da star attent…e baincomal fa’l uossa segn a mai da repeter quella seria da movimaints ch’el ha güsta fat avant. Ingio d’eira da cumanzar?  

Eu n'ha durmi ed uschea esa greiv dad imprender. Las duos nots avant n’haja durmi in üna da las quatter chombras dublas süssom la chasa, là ingio cha da quella jada as chattaivan la stanza da zambriar e la scoulina. In quella d’eir’eu üna da las unicas chi nun inclegiaiva co chi d’eira da leger l’ura. D’eira las duos e trais o las trais e duos? Effectivmaing d’eira las trais e desch. Eu nun inclegiaiva e plü co fazil vaiva insömgià dad oters muonds e mancantà il plü important. Precis co cha her ed hoz nu suna statta buna da tegner adimaint che pè chi d’eira da metter davant, chenün davo e che man chi stumplaiva davent a chenün in che direcziun. Eu m’algord pero vi da la chanzunina Chinaisa, quella am perseguitescha amo ün pêr dis davo.

Di da las portas avertas: 28 da mai, das las 12.00 fin las 16.00


Text: C. Gustin, Turitg
Fotografias: C. Gustin, Turitg e Center da Bainesser, Tschlin

Infos e termins: http://www.bainesser.com
https://www.facebook.com/bainesserswitzerland


 

Suonda LATABLA!


Da Corina Gustin - Corsin Biert quinta da seis proget da cour; ün incumperabel retreat da Tai Chi, Shaolin Kung Fu e Qui Gong immez las alps Svizras. Ils prüms avrigl es planisada l’avertüra dal center da bainesser a Tschlin, ün cumün chi'd es intant cuntschaint sco funtana dad ideas innovativas e chi s’allegra süls nouvs abitants da la China.

Il center da bainesser es tenor tai alch tuot nouv in Europa. Che es special vi dal center a Tschlin? Scoulas da Tai Chi, Qi Gong ed otras scienzas Chinaisas sun fich derasadas?
Il nouv o il special es cha noss experts - ils muongs - vivan quia a Tschlin tuot on. Cuors da Tai Chi, Shaolin Kung Fu e Qi Gong daja daspö blers ons eir pro no in Europa, vegnan pero manats per la gronda part da magisters da quia chi han imprais l'art dürant ün tschert temp in Asia. Minchatant offran quels cuors cun ün expert asiat, quai pero maximum ün pêr dis l'on cun fich blers interessents.
Pro no saran maximal 10 persunas in ün cuors.

Sun ils muongs, uriunts da la provinza da Shandong in China, fingià stats a Tschlin? 
Na, els nu sun amo stats quia ma eu tils n'ha tramiss fotografias per sms. No tils vain miss a disposiziun telefonins per ch'els possan restar in contact cun lur cuntschaints e paraints. Els vivan in üna regiun simila plüchöntsch solitaria e sun ferm attachads a la natüra uschè cha l'Engiadina tils plascha fich bain.

Tü hast passantà quatter mais in üna clostra in China – co guarda oura ün di tipic? Our dals films cugnuoschain nus ils muongs da Shaolin sco maschinas da cumbat...
Ün di solit da lündesdi fin sonda cumainza plü o main cur chi vain cler cun Tai Chi. Davo la culazchun segua ün training da Shaolin Kung Fu fin a mezdi. La posa da mezdi es cuorta ed il davomezdi es occupà cun daplü training. Regularmaing esa da lavurar vi da la cundizun, per exaimpel cun üna cuorsa sü per üna muntogna. Minchatant daja cuors da caligrafia chinaisa o otras arts chinaisas davo tschaina. Cur chi vegn s-chür as chatta svessa eir charcheu sia quieteza. La dumengia es il di «liber» chi's passainta cun far uorden, lavar l'altschiva e trenar per sai svess. Circa uschè sarà eir structurà ün di da cuors a Tschlin.

La vita in üna clostra chinaisa - üna vita sco a l'hotel?
I's dorma effectivamaing sün ün’assa da lain e's parta la stanza cun diversas persunas. Eir las tualettas e la «duscha» sun fich simplas e na da congualar cun quai cha no cugnuoschain uschè cha'l pled «hotel» nun es il dret ;)

Grazia fitg a tut ils sponsurs da LATABLA:

  • Shop online!
    Shop online!
  • www.quartalingua.ch
    www.quartalingua.ch
  • Tel. 081 864 15 81
    Tel. 081 864 15 81
  • Tel: 081 852 45 45
    Tel: 081 852 45 45
  • Adüna bun - cafè grischun
    Adüna bun - cafè grischun
  • www.belain.ch
    www.belain.ch
  • L’Institut dal Dicziunari Rumantsch Grischun
    L’Institut dal Dicziunari Rumantsch Grischun
  • La Giuventetgna Rumantscha
    La Giuventetgna Rumantscha
  • Tel. 081 864 01 51
    Tel. 081 864 01 51


Che at mancaiva in tia vita quia in Svizra e che hast imprais dürant il temp in China?
Eu n’ha d'üna vart imprais chi’s po esser fich cuntaint ed alleger eir sainza tuot quel luxus cha no vain. Da tschella vart cha la vita ha lö impustüt aint il minchadi, aint il preschaint. Quai as doda pro no natüralmaing eir adüna daplü, pero nos möd da viver nu permetta quai bod na. Esser sainza telefonin, computer, Google e Facebook, pero eir il esser isolà güda fich da’s pudair sviluppar in quella direcziun.

Co d'eira quella isolaziun per tai?
Vairamaing nun es quai nügl’oter sco avair temp per sai svess sainza gnir distrat. Dimena alch fich bel, ün'isolaziun in ün segn fich positiv.

Chi sarà il tipic giast i'l center da bainesser?
Quai am da eir da buonder. No eschan averts per tuots, istess quant vegl, hom o duonna, principiant o expert. I’s po gnir per ün cuors dad ün'ura ma eir star daplüs mais.

Che chattarà il giast in sia stanza e che tschercharà'l sainza success?
Spranza chatta’l chi nun es da tscherchar ;)

Co saraja pussibel da comunichar culs muongs e crajast ch'els sajan interessats vi d'ün cuors da rumantsch?
Els imprendan actualmaing inglais e sun interessats vi da fichfich bler - chi sa! L'idea dad ün muong Chinais chi discuorra rumantsch es bellischma.

Intervisa: C. Gustin, Turitg 
Fotografia: C. Biert, Tschlin

Infos e termins: http://www.bainesser.com
https://m.facebook.com/bainesser/

REGISTRAR E GUDAGNAR: Weekend da Kung Fu, Tai Chi o Yoga

 

Suonda LATABLA!

Forsa er insatge per Vus:

5 giadas ir ad in ir

5 giadas ir ad in ir

26 d'avust 2020

Da Silvana Derungs (DRG) – La lingua rumantscha è ritga. Quai savain nus...

5 fritgs fauss

5 fritgs fauss

15 da fanadur 2020

Da Silvana Derungs (DRG) – La lingua rumantscha è ritga. Quai savain nus...


Da Corina Gustin - 
Arno Camenisch quinta da seis cudesch "Die Launen des Tages" e perche ch'el ha adüna oura las antennas.  

In teis nouv cudesch "Die Launen des Tages" quintast istorgias cuortas our da tia vita internaziunala. Scha tü vessast da tscherner üna da quellas per implir ün roman inter, chenüna füss quai?
El cudisch „Die Launen des Tages“ mein nus cun ina figura tras differentas historias, en tut 22 historias, empau sc’in roman d’episoda. La figura va d’ina bredouille ella proxima, e naturalmein vai adina era per l’amur. Tgei ch’interessescha mei en particular ei il mument d’inscunter. Sch’jeu stuess eleger ina episoda preferida fuss ei forsa quella „An der Tankstelle“.


Daja ün' istorgia in quist cudesch chi ha fuormà tia vita particularmaing?
Quei ein situaziuns e muments che capetan a nus tuts. Ei schabegia savens ch’enzatgi di a mi, quei ei era schabegiau a mi. Interessant eis ei lu, cu las lecturas ed ils lecturs anflan sesez en in cudisch. Quellas historias ein buca ligiadas vid in temps, quellas duein aunc en trenta onns esser actualas. In carstgaun entaupa in auter, quei mument semida buca, emporta buca tgei gadgets che nus havein en entgins decennis.


La furtüna, la vita, la mort, tuot capita cur cha no spettain al main da tuot?
Nus vivin en in temps particular, entras ils mieds tecnologics cun smartphones, twitter etc., ei la controlla in tema fetg grond. Quels mieds dattan a nus la sensaziun dad adina haver tut sut controlla. Quei para ina biala illusiun. Ils muments interessants ein quels che nus savein buca controllar.


Crajast cha la vita digitala dad hozindi ans impedischa minchatant da passentar aventüras spontanas sco cha tü tillas descrivast?
Lein dir ei aschia, la veta para pli interessanta, sch’ins sa buca tut. Interessant ei quei ch’ins sa buca, il misteri.


Tü parast dad esser ün rebel liber chi lascha capitar la vita sco ch'ella vegn, est spontan e nun hast gugent generalisaziuns; co descrivessast tü a tai svessa? E quant ferm at definescha tia lavur?
Jeu sundel in tip attent. La basa pil scriver ei d’esser attents ed aviarts enviers il concarstgaun. Ins ha adina ora las antennas.

Grazia fitg a tut ils sponsurs da LATABLA:

  • www.quartalingua.ch
    www.quartalingua.ch
  • La Giuventetgna Rumantscha
    La Giuventetgna Rumantscha
  • Tel: 081 852 45 45
    Tel: 081 852 45 45
  • Adüna bun - cafè grischun
    Adüna bun - cafè grischun
  • L’Institut dal Dicziunari Rumantsch Grischun
    L’Institut dal Dicziunari Rumantsch Grischun
  • Tel. 081 864 01 51
    Tel. 081 864 01 51
  • www.belain.ch
    www.belain.ch
  • Shop online!
    Shop online!
  • Tel. 081 864 15 81
    Tel. 081 864 15 81


Ütiliseschast tü Twitter, Instagram, Snapchat e. u. i? Che pensast dals mez digitals moderns?
Jeu haiel ina Web ed utiliseschel Facebook. Haiel era gia ponderau dad esser activs sin Twitter ed Instagram, haiel denton aunc buca fatg il pass, aber baul ni tard vi guess far in’emprova, ord marveglias.


Tü est immez üna turnea inter-europeana per preschantar teis cudesch e tuornarast inavo cun schurmas dad inspiraziuns; avuonda per implir ün oter cudesch? Forza ün per rumatsch?
Scriver ei empau sco pescar, il pèsch morda lu, cu ins spetga buca. Las bunas ideas vegnan tuttenina, en in mument ch’ins spetga buca, pia muments sco ellas historias da „Die Launen des Tages“. Il liug ei buca impurtonts, quei ein historias che savessen capitar dapertut. E naturalmein han mias historias era adina ina nota scurila ni absurda, ils muments absurds dalla veta interesseschan mei. E la summa dall’absurditad essan nus.


Sco artist da linguas scrivast tü per rumantsch ed eir per tudais-ch; che lingua scrivast plü facil?
Jeu scrivel pli stedi per tudestg, aber adina puspei era in text per romontsch. Quei fetschel, perquei ch’jeu haiel plascher. Il plascher ei il sulet motor ed era mia motivaziun. Il tudestg ei plitost miu lungatg da litteratura, il romontsch il lungatg dil cor. Aber la finfinala vai adina pil scriver e per las historias ch’jeu raquentel, quellas stattan el center, emporta ussa buca sche per tudestg ni per romontsch.


Sco rumantsch chi viva i'l «exil»; che manajast tü da l'opiniun cha'l rumantsch haja ün problem da prestisch?
Na.


Tü hast dit üna jada cha'l tudais-ch e l'inglais toccan sco il rumantsch eir pro las linguas chi pudessan svanir – da vardà?
Tgei ch’jeu vi dir cun quei ei ch’il lungatg semida. Lungatg ei enzatgei che viva, plaids svaneschan e novas expressiuns vegnan. Il lungatg ei lingiers, ei en moviment, ed in lungatg viva aschiditg ch’el vegn plidaus.

Che dumonda nun hast amo mai pudü respuonder o che dumonda fessast tü a tai svess?
Cheu dessi guess in sfrac. Aber a tuttas rispundel lu buca, gell : )


Che es il rumantsch per tai?
Jeu haiel semplamein fetg bugen il romontsch, j’adore!


Fotografia: (c) Janosch Abel


Proximas prelecziuns:

30.01. Cuoira/Cuira
Exposiziun "Live gibt es nur ein Mal"
Infos suondan

02.02. Zug
Prelecziun e musica da Julian Sartorius
Theater Casino, 20h - Tickets

04.02. Altdorf
Prelecziun Die Kur + Die Launen des Tages
Kellertheater, 20.15h - Tickets

09.02. San Murezzan
Prelecziun e musica da Roman Nowka
Kulturprogramm Ski WM, 16h + 17h

10.02. Willisau
Prelecziun Die Launen des Tages e musica da Roman Nowka
Rathausbühne, 20h

23.02. Sirnach
Prelecziun Die Launen des Tages
Infos suondan

24.02. Lavin
Prelecziun Die Launen des Tages e musica da Roman Nowka
Bistro Staziun, Infos suondan

26.02. Hamburg
Prelecziun Die Launen des Tages
Hotel Wedina, 17h - Tickets

27.02. Salzburg
Prelecziun Die Launen des Tages e musica da Roman Nowka
Literaturhaus, 19h

Daplü datas sün facebook o sün http://arnocamenisch.ch/


Forsa er insatge per Vus:

5 giadas ir ad in ir

5 giadas ir ad in ir

26 d'avust 2020

Da Silvana Derungs (DRG) – La lingua rumantscha è ritga. Quai savain nus...

5 fritgs fauss

5 fritgs fauss

15 da fanadur 2020

Da Silvana Derungs (DRG) – La lingua rumantscha è ritga. Quai savain nus...


Da Corina Gustin - 
Bunura, cuort avant las set. Intant paraiva da gnir ün da quels dis tuot ordinaris. L'utuon d'eira rivà, il grand bös-ch dadour chasa perdaiva plan a plan darcheu ses vesti e la vista gio invers la cità ed il Prime Tower gniva adüna plü libra. La vietta chi maina da mi'abitaziun tras il godin fin gio pro la via prinzipala d'eira cuverta cun föglias da tuot las culurs. Il tschêl glüschiva "blau sco la mar" co cha nona dschaiva e da tschella vart da la cità splendurivà fingià il sulaj sur il Züriberg oura. Che bel cumanzamaint, che di da belezza.

L'avant mezdi in büro d'eira intant eir passà sainza gronds disturbis ed excepziuns. Il cafè d'eira delizius, il schef adüna fatschendà al telefon ed ils collegas da lavur tuots lavurus sco furmias ed ingaschats cun lur incumbenzas. Istess chattan els temp da salüdar amiaivelmaing e da dar la baterlada obligatoria cur ch'eu pass speravia in direcziun dal printer. Il toner dal tal nu d'eira sco adüna l'incumbenza dad ingün e natüralmaing vöd cur ch'eu til vess douvrà urgiaintamaing cuort avant mezdi. Intant han quists patents touchscreens, fan musica, fan fouras i'ls fögls, mettan aint clambras, tramettan fax ed otras nardats...ma müdar las patronas da culur as stoja amo adüna svess.

Eu barat la cartuscha naira e dafatta il "vaste-toner" chi spetta pront sün sia trocletta dasper la maschina maladüsada. Uossa pero svelt tagliar la corda avant co cha Oliver am vezza, inschinà vegna massa tard a meis termin da giantar. "Compulsive talking", il pled inglais per üna conversaziun chi va bler plü inavant co quai chi'd es considerà sozialmaing acceptabel.

Spettond sül tram duna ün sguard sün las ultimas novitads e meis e-mails. Mi' ögliada passa adüna darcheu sur il telefonin oura, uschè n'haja tuot sout controlla. In duos minuts riva il tram e dasper mai spetta üna dama cun ün fazöl elegant cotschen rösa, üna blusa da fluors, chavels albs ed ögliers raduonds sainza rom. "Hm...quista guarda oura sco Donna Leon, chi sa sch'ella sa" pens'eu e leg inavant l'istorgia davart ün'otra persunalità cuntschainta americana chi ha d'incuort gudagnà l'elecziun pel presidi.

Grazia fitg a tut ils sponsurs da LATABLA:

  • www.quartalingua.ch
    www.quartalingua.ch
  • Shop online!
    Shop online!
  • Adüna bun - cafè grischun
    Adüna bun - cafè grischun
  • L’Institut dal Dicziunari Rumantsch Grischun
    L’Institut dal Dicziunari Rumantsch Grischun
  • Tel. 081 864 15 81
    Tel. 081 864 15 81
  • Tel. 081 864 01 51
    Tel. 081 864 01 51
  • Tel: 081 852 45 45
    Tel: 081 852 45 45
  • www.belain.ch
    www.belain.ch
  • La Giuventetgna Rumantscha
    La Giuventetgna Rumantscha


Forsa es quai propcha Donna Leon am saglia in testa sco üna frizza. Sco quella jada aint l'eroplan in viadi vers la Cipra ch'eu tschantaiva dasper üna bella giuvna cun bellas unglas manicüradas, chotschas d'ota qualità, üna da quellas tas-cha cun ils Ls e Vs e bellas s-charpas da marca cun üna soula cotschna. Eu vaiva dat bada ch'ella guardaiva oura ün zich sco üna chantadura cuntschaina svizra. Davo esser sezüda dasper ella duos uras plain buonder sumagliav'la adüna daplü a quella ed eu vaiva pudü constattar ch'ella nu guardaiva be oura sco la chantadura...na, ella d'eira la chantadura. O ün'otra jada a Los Angeles - quel schani chi d'eira bod chaminà sur mai oura ed am traiva adimmaint ad Arnold? Davo cha seis homens am vaivan muossà la via vaiva realisà cha quai d'eira stat il terminator in persuna.

Uschea cha quista quia sarà Donna. In persuna.

Il tram vain ed ün davo tschel entran tras la porta stretta. Eu tscherch ün sez cun buna vista davo la duonna. Google es fingià avert ed eu tip aint seis nom aint il spazzi. Bildersuche. Clic.

Schi, quai es la scriptura chi dà regularmaing prelecziuns a Segl e posseda üna bella chasa in Val Müstair. Quai sto'la esser...la fotografia sün meis display muossa l'istessa duonna cun precisischem quels ögliers unics.

Eu vess da sortir la prossma ma decid da star aint fin cha Donna sorta. "I'm dischplascha," scriva a mia collega, "eu gnarà cun ün zich retard. At quint lura, grazia :)". Eu sà ch'ella am perdunarà.

Donna legia ün cudesch e sün seis bratsch sezza üna tas-cha da stoffa dad üna libraria. Aint in quella transport'la diversa literatura inglaisa, quai vezz'eu cur ch'ella metta a lö sia roba e's fa promta per sortir. A la fin...quists 7 minuts am paraivan lungs sco l'eternità.

Eir eu sort e cuor davo a Donna chi para dad avair prescha. Per il nair d'ün'ungla tilla vessa persa, sch'eu nu fetsch svelt avuonda e'la davent ed eu n'ha laschà spettar a meis termin per nüglia.

"Donna" clom eu davo a la signura cun chommas sveltas. Ella ferma e guarda inavo cun ün'ögliada plain dumondas ma istess amiaivla.

Eu tilla decler ch'eu tilla laiva far ün cumplimaint per sias ovras plain tensiun chi divertischan a trais generaziuns da mia famiglia. Mia nona, mia mamma e mias sours sun be narras da leger ils crimis da Brunetti. Ella s'ingrazia pel cumplimaint ed avant sco ch'ella possa cuorer inavant tilla quint'eu da nossa pagina rumantscha. Ella es tuot interessada e declera cha'l rumantsch saja üna bella lingua e cha sco otras linguas raras saja da tilla chürar e preziar. "I füss bain trist sch'ella disparess!" clom'la davo e svanischa aint il nummer 3.

Text e fotografia: C. Gustin, Turitg


Suonda LATABLA!


Forsa er insatge per Vus:

5 giadas ir ad in ir

5 giadas ir ad in ir

26 d'avust 2020

Da Silvana Derungs (DRG) – La lingua rumantscha è ritga. Quai savain nus...

5 fritgs fauss

5 fritgs fauss

15 da fanadur 2020

Da Silvana Derungs (DRG) – La lingua rumantscha è ritga. Quai savain nus...


Da Corina Gustin -
Cun il post #baldistessoweit #natur #freiheit #stille #wundervollezeit #bündnerjagd s’allegra la chatschadra svizra 2016-2018 Silvana Stecher-Caviezel via Facebook sülla chatscha chi cumainza in pacs dis. L’Engiadinaisa cul rier simpatic quinta da sia paschiun e da la “Sauer 404”.

Silvana, sün che mumaints da chatscha t’allegrast impustüt?
Eu m’allegr sün duos eivnas esser davent dal minchadi, sün duos eivnas distanza da computers e telefons. Eu giod l’ajer frais-ch e tuot las glünas da la natüra. Implü m’allegra sül temp da cumpagnia, perche quists dis dan tuot ün’otr’importanza a las relaziuns – eu vegn a chatscha cun meis bap, meis frar ed ün cumpogn.

Ün dals plü bels mumaints da la chatscha es però a la fin, scha tü rivast da schluppetar il buttin. Eir il plaschair per oters chi han gnü success es ün bel mumaint, minchatant sun quels evenimaints bod amo plü bels.


Daja eir mumaints difficils dürant la chatscha?
Il prüm an da chatscha n'haja stuvü tegner oura lönch, pür il terzultim di da quellas duos eivnas da chatscha n’haja gnü success e n’ha pudü schluppettar üna chavra da chamotsch. Il prüm an as vaja a chatscha cun uschè bleras aspettativas, eu sun ida fingià là la via dürra e n’ha stuvü imprender chi nu’s po be ir e cleger las bes-chas gio da la bos-cha. Quai d’eira greiv ma üna buna lecziun.


Il tour oura il dadaint d’üna bes-cha nu’t fa fadia?
Eu nu n’ha mai gnü grondas fadias da far quella lavur chi tocca pro pro la chatscha e pro’l sajettar üna bes-cha. Amo main greiv esa gnü daspö ch’eu n’ha let ün cudesch cun recepts da masdinas tradiziunalas chi vegnan fattas our da prodots da sulvaschina. Eu pigl eir cun mai il grass da las bes-chas e fetsch svessa üna salba. Quella güda cunter barba giat, mal la rain, mal ils schnuogls. Vairamaing güda ella per tuot ils mals pussibels, dafatta cunter la tuoss.


Che sarà quist an/on different dad oters – tü est chatschadra Svizra 2016-2018?
La seguond’eivna da chatscha vegna accumpagnada dad ün team dal SRF per duos emischiuns da televisiun. Üna da quellas es per il «10vor10», quai es natüralmaing sensaziunal e sgüra unic ed interessant.


Quant ferm t’engascha il titel d’ambassadura da chatscha?
Sur stà esa stat ün zich plü quiet però uossa vers la fin d’avuost ha natüralmaing darcheu cumanzà il temp intensiv cun evenimaints specials ed intervistas.

Grazia fitg a tut ils sponsurs da LATABLA:

  • Tel. 081 864 01 51
    Tel. 081 864 01 51
  • www.belain.ch
    www.belain.ch
  • Tel: 081 852 45 45
    Tel: 081 852 45 45
  • Tel. 081 864 15 81
    Tel. 081 864 15 81
  • La Giuventetgna Rumantscha
    La Giuventetgna Rumantscha
  • Shop online!
    Shop online!
  • Adüna bun - cafè grischun
    Adüna bun - cafè grischun
  • www.quartalingua.ch
    www.quartalingua.ch
  • L’Institut dal Dicziunari Rumantsch Grischun
    L’Institut dal Dicziunari Rumantsch Grischun


Il schluppet es pront e funcziuna?
Schi, meis schluppet nouv be spetta da gnir our’d s-chaffa. La firma «Sauer» m’ha regalà ün avant ün per eivnas ed eu m’allegr fich da til douvrar; üna Sauer 404 cun ün „ZF“ (perspectiv) da Swarovski. (Silvana da üna risada ed am corregia cur ch’eu pretend cha seis ZF haja in quel cas sü cristals glüschaints da Swarovski. Lura am decler’la detagliadamaing che chi’d es ün ZF).


Che nu po mancar aint illa buscha d’üna chatschadra?

Eu n’ha ün portafurtüna chi tocca adüna aint in gialoffa o aint illa buscha – üna culana cun ün cour ch’eu n’ha surgni da mia mamma. Sainza furtüna nu schlupetta gnanc’il meglder chatschader il butin; I’s sto antivar ün bun di persunal, i douvra il dret vent, la bes-cha sto esser il dret mumaint al dret lö…finalmaing ston tuornar tants facturs ed apunta eir üna purziun furtüna nu po mancar.


Co sun scumpartidas las rollas in chamonna?
La scumpartiziun da rollas in chamonna es fich simpla, quel chi finischa seis di da chatscha sco prüm fa fö e cumaninza a cuschinar, per la paja lava giò inchün oter. I regnan reglas modernas, eu nun ha da far la chasada da chamonna perquai ch’eu sun üna duonna. Quai es flot, eu cuschin uschigliö fingià tuot on (ella ria).


Co guarda oura teis program per trenar la cundiziun, douvrar las s-charpas da muntogna ed portar la buscha ed il schluppet - tuot quel pais?
La paschiun da chatscha tegna vairamaing fit tuot an, i’s chamina bler, i’s va a guardar sulvaschina, i’s va adüna darcheu in chamonna o a metter oura sal. Il pais illa buscha però, quel badaraja pür darcheu ils 3 settember. Davo duos o trais dis nun es quel però ingün tema plü, eir sainza trenamaint special, dieta o coach. Eu nu met neir na sü la buscha per ir a lavurar in banca, quai nun ha intant amo fat dabsögn.


Tü vast eir a chatscha our’d pajais. Che sun las differenzas?
Vairamaing nu’s poja congualar la chatscha grischuna cun otras, per exaimpel cun la chatscha da püerchs sulvadis in Germania. Quella es eir bella, ma tuottafat differenta. I’s piglia l’auto, i’s va a spettar cun clerglüna e davo as vaja darcheu a chasa. Üna roba confortabla vairamaing. Dürant la chatscha grischuna as chamina kilometers sainza fin e’s sta in üna chamonna simpla. Eu nu füss buna da dar sü la chatscha grischuna per üna chatscha a l’ester.


Che es il rumantsch per tai?
Il rumantsch es per mai patria, dachasa, infanzia. La lingua da la famiglia, la lingua illa quala eu m’exprim il meglder. 



Daplü da Silvana: sün facebook o sün www.schweizerjaeger.ch
Intervista: C. Gustin
Fotografia: S. Stecher-Caviezel


FA PART, commentescha sutvart! 

+++ Il spiert da cuminanza è important ed uschia è mintgin bainvegni da sviluppar quist project cun nus; Igl è pussaivel da registrar events e nus publitgain Vossas novitads. Scha vus avais gust da contribuir in artitgel ans pudais trametter in e-mail sin This email address is being protected from spambots. You need JavaScript enabled to view it.

Pagina 4 da 4

Reclama:

Newsletter:

Adressa d'email:

Prenum:

Num:


POPULAR IN QUESTA CATEGORIA:

Il Project

30 da fanadur 2018

pinc e provocativ: Cura che ins entra in territori rumantsch na badan ins betg che ins è uss en il territori rumantsch: Ils nums dals lieus ed ils toponims èn...

5 giadas fitg fraid

14 da favrer 2018

Da Silvana Derungs (DRG) –  La lingua rumantscha è ritga, uschè ritga che nus pudessan atgnamain ans servir pli savens da sias bellezzas e ritgezzas – e da tut sias...

La columna - Chi chi nu tschercha chatta

28 da november 2017

Da Fadrina Hofmann - L’uman es ün chatschader e ramassader. La cumprouva n’haja a chasa in fuorma da duos uffants chi chattan roba da tour e mütschir. Ün insaj? Voilà...

Jeu spetgel ...

05 da december 2017

Dad Annatina Nay - Duas figuras en in toc da teater da Samuel Beckett. Estragon e Wladimir sesanflan en in liug buc definau, sin in stradun, sper ina plonta. Els...

5 bellas chauras

10 da schaner 2018

Da Silvana Derungs (DRG) – La lingua rumantscha è ritga – uschè ritga che nus pudessan atgnamain ans servir pli savens da sias bellezzas e ritgezzas. Oz datti tschintg bellas...

5 bellas dunnas

16 da matg 2018

Da Silvana Derungs (DRG) –  La lingua rumantscha è ritga – uschè ritga che nus pudessan atgnamain ans servir pli savens da sias bellezzas e ritgezzas. Per exempel datti bels prenums, nizzaivels betg mo...

5 feghers Franzos

18 da fanadur 2018

Da Silvana Derungs (DRG) – La lingua rumantscha è ritga – uschè ritga che nus pudessan atgnamain ans servir pli savens da sias bellezzas e ritgezzas. Per exempel quellas influenzadas...

Sonntag & Sohn, Leipzig

04 d'october 2017

Da Romana Ganzoni - Sonntag & Sohn. Juweliere. I sun a Leipzig. A Leipzig ha stübgià Goethe giuris prudenza, ed uossa vaja darcheu amunt, la cità es hip, pulsescha. In...

Go to top