increase font size 
Da Dominique Dosch -
Igl svilup d’ena plant’exotica dall’antschatta anfignen la fegn. Tgi so da tgenegna tgi sa tracta…?
Igl è tot stgeir. Ed ampernevel. Ia sung anzuglia ainten la tera frestga tgi è cuverta cun figlias da bananas. A me vogl stupent ed ia realisesch mianc, scu tg’igl taimp passa. Ia cresch veapi ad ot. D’en de sen l’oter ma stompla sur la surfatscha dalla tera bregna. Las figlias sitgas èn davent ed ia degl igls mies ameis. Nous ans cattagn an cups sot tetg, schurmageas dall’ora varionta. Magari vignan no gigants per ans cultivar. Chegl catta flot. Cugl mies lung fastei verd-cler ascenda de per de e giold veaple vista. La nossa sosta ò nignas pareis ed ia admeir igl gôt semperverd tg’ans circumdescha. Magari sainta la caneratscha dalla plievgia ed admeir las gutellas nundumbrevlas tgi corran scu cascadas giu digl tetg. All’antschatta vaia bagn en po tema da tals urezis tg’èn savens accumpagneas da tgametgs anetgs e ramours snuevlas. Ma ensacuras suondan adegna igls radis digl suglegl tgi carsineschan las plantas sclarond e scaldond la nateira. Alloura para da surreir igl antier ambiaint.
►FA PART, commentescha sutvart!+++ Il spiert da cuminanza è important ed uschia è mintgin bainvegni da sviluppar quist project cun nus; Igl è pussaivel da registrar events e nus publitgain Vossas novitads. Scha vus avais gust da contribuir in artitgel ans pudais trametter in e-mail sin This email address is being protected from spambots. You need JavaScript enabled to view it. |
Autura LATABLA dapi avust 2016 - Dominique Dosch (21) è carscheida se a Tinizong. Gio da pitschna anse ò‘la invento gugent istorgias, uscheia tg’ella è sa participada a diversas occurenzas da screiver rumantschas. Igl onn 2013 è nia publitgia igl sies roman da fantascheia “Sindoria” dalla Chasa Editura Rumantscha. Ossa abitescha ella a Friburg e fò en studi da psicologia, pedagogia e rumantsch.
