Da Corina Gustin – Ün concept per crear ün spectacul chi fa rier nu daja tenor Flurin Caviezel. El ha gnü furtüna cha l'umur es in famiglia e preschenta ses programs gugent dovrond sia maisda magica «flurinica»: «Per l’amur dal linguaggio funny tout le monde lacht.»

D'ingionder vegn teis umur? Es quel in famiglia?

Schi, eu sun creschü sü in üna famiglia ingio cha no vain ris bler. E là n’haja imprais chi nu’s po be rier sur dad oters, ma eir sur da sai svessa.


Co es quai capità cun tia carriera da cabarettist?

L’impuls decisiv es statta üna rapreschantaziun dal grond clown Dimitri i’l teater da la cità a Cuoira. Eu vaiva 17 ons e sun stat talmaing inchantà dad el, ch’eu sun i davo la fin da seis teater davo il palc, n’ha cloccà vi da l’üsch da sia gardaroba ed el m’ha fat gnir aint. Intant cha Dimitri pigliaiva davent sia schminca, m’ha’l dat tips e fat curaschi. I ha lura listess dovrà ons cun bleras sviadas fin ch’eu sun dvantà cabarettist. Ils prüms pass plü professiunals n’haja fat insembel cun Andrea Zogg e Rolf Schmid ils ons 90 aint il Cabaret 3iDee.

Co descrivessast tü teis stil da cabarettist?

Id es üna cumbinaziun da pled e musica. Meis böt es dad esser divertent e spiritus. Per mai esa eir important cha’l public bada che tenuta ch’eu n’ha. 

Chenün es teis viz predilet?

Ün paur sper Wetzikon vezza üna bunura 100 pinguins sün seis prà. El cumonda lura a seis famagl da manar las bes-chas i’l zoo da Zürich. La davomezdi va il paur cun seis Range Rover in cità e cur ch’el voul passar il Bellevue, schi sto’l spettar, perquai cha 100 pinguins traversan la plazza. Il paur fa giò la fanestra e disch al famagl chi chamina sco ultim davo la colonna: “Eu n’ha bain dit cha tü lessast ir aint il zoo cun els!” Ed il famagl: “Là eschna fingià stats, uossa vöglna ir amo a kino.”

Che robas fan rier a tai svessa?

Roba dal minchadi. E quai sun suvent robas chi capitan a mai svessa. Tschel di per exaimpel am n’haja lavà la fatscha ed invlidà da tour giò meis ögliers.

Sainza la musica nu vessa mai ris-chà il pass sül palc

Vaivast dubis da't preschantar sül palc ad ün public plü grond? Scha schi: Perche e chi t’ha dat il curaschi da müdar idea?

Na, dubis nun haja gnü cur ch’eu n’ha cumanzà, e quai grazcha a la musica. Sainza quella nu vessa mai ris-chà il pass sül palc. Cunquai ch’eu vaiva fat fingià üna pruna experienzas sco musicant, am sentiva sgür in quel chomp. Eu savaiva cha quai funcziuna. Ma i ha adüna darcheu dat mumaints, per exaimpel avant premieras, ingio ch’eu d’eira e sun amo adüna fich nervus. Funcziuna o nu funcziuna? Quai sun mumaints da gronda tensiun.

Haja dat ün mumaint chi d'eira spezialmaing penibel dürant ün'inscenaziun?

Üna jada a Rapperswil i’l teater Grünfels pro meis program chi trattaiva d’üna reuniun da classa d’eira sco adüna i pro la scena da la polonesa chantond e sunond l’orgel da man giò dal palc illa prüma lingia dal teater. Il tecniker vaiva sco adüna iglüminà quistas plazzas, ed eu n’ha sco adüna animà ad üna singula persuna cun segns da pender aint pro mai sco prüma persuna per far la polonesa. Eu d’eira adüsà chi laiva ün pa perseveranza, fin cha “mia victima” staiva sü, ma eu nun ha mai dat loc. Uschea eir quella saira, ma sainza success. Quai es stat l’unica jada ch’eu n’ha stuvü dar sü. Pür davo la rapreschantaziun suna lura gnü a savair cha quella persuna d’eira orba.

Vegnan las ideas per teis programs dandettamaing o daja üna strategia?

Füss flot schi dess üna strategia. Lura dess eu cuors in tuot il muond e fess raps sco crappa cun la OCCS, cun la “Original-Caviezel-Comedy-Strategy”. Id es different: minchatant am bütscha la musa e lura vaja sco da sai e minchatant nu voul ella dar gnanca üna struschadina e lura daja be üna strategia: lavurar, lavurar ed amo üna jada lavurar. Dit culs pleds da Edison: 1% inspiraziun, 99% transpiraziun.

Daja üna dumonda cha ingün mai nu t’ha dumandà? Üna cha tü be spettast da respuonder?

Schi la dumonda: “Daja üna dumonda cha ingün mai nu t’ha dumandà?”.

Chi o che t'inspirescha e perche? Chi o che es stat la plü gronda inspiraziun in tia vita?

I dà üna pruna robas chi m’inspireschan. Quai po esser ün toc musica, ün purtret, üna persuna, ün inscunter, ün sömmi ed amo üna pruna oter. L’important es chi dà o chi po dar alch landroura. Pel solit ün’istorgia. Co füssa scha…? Quai am dumonda suvent e lura naschan istorgias, minchatant fich scurrilas. La plü gronda inspiraziun es stat meis bazegner Nott Caviezel da Seraplana. Schabain ch’eu sun nat be 3 mais avant sia mort e nu poss m’algordar dad el, schi’m n’haja fat ün purtret dad el tenor ils raquints sur dad el impustüt da meis bap chi aduraiva a seis bab. Fingià dad uffant vaiv eir eu quista admiraziun per “Barba Nott” sco chi til nomnaivan, ün paur, lavuraint da god, frodulader, musicant e para cun ün dun special da trategner la glieud cun sia musica, sias istorgias e seis umur.

Plü vegl ch’eu vegn e plü bletsch chi vegn

Che films guardaivast dad uffant?

Meis prüm film es stat “Winnetou, ab 11 Jahren” i’l kino Apollo a Cuoira illa prüma lingia. Eu vaiva cret cha quai füssan las megldras plazzas. Per mai es quai stat ün pitschen desaster cun quista taila immensa da Cinemascop. Meis cheu giaiva - sco pro ün match da tennis - dürant tuot il film vi e nan, da Old Shatterhand pro Winnetou, da Pierre Brice pro Lex Barker.

Che t'occupa pel mumaint?

Pel mumaint suna ch’eu scriv, ch’eu cumpuon la musica per ün gö auditiv pel radio SRF. Il toc ha nom “Rosina 1918” ed i’s tratta dal tschöver general in Svizra.


Che nu sa la glieud da tai?

Tuot quai chi nu ston savair da mai. E ch’eu n’ha üna vart fich sensibla. A kino, ma eir a chasa sun eu il prüm chi tschüffa las larmas. E plü vegl ch’eu vegn e plü bletsch chi vegn.

In tschinch ons…

…sperescha dad esser amo adüna frisch e san e dad avair eir inavant uschè blera furtüna sco ch’eu n’ha gnü fin hoz in mia vita.

Il rumantsch es per mai…

…üna lingua sco tuot tschellas. E per cas esa mia lingua materna e paterna. E per mai sco artist üna USP, in rumantsch: üna unique selling position .

 

Bio:
Creschü sü per part a Ramosch in Engiadina Bassa, a Vicosoprano in Bergalia ed a Cuoira. Stüdi da musica ed istorgia. Dal 1983 fin al 2000 musizist «Ils Fränzlis da Tschlin». Hoz abita el a Cuoira, es maridà ed ha duos uffants.

Hobbies: Ir cul velo, Mountainbike e gitas a l’ester.

Prossems termins:

25.10.2018, Vaduz
20:00, Schlösslekeller

26.10.2018, Solothurn
20:15, Kulturm

27.10.2018, Gais
19:30, Hotel Krone

30.10.2018, Uster
17:00, Kath. Pfarreizentrum St. Andreas

31.10.2018, Rüti/ZH
19:30, Buchladen wörterNest

10.11.2018: Amden
20:00, Primarschulhaus – Aula

11.11.2018: Turich
18:00, Theater am Hechtplatz

(...)

Daplü:
https://flurincaviezel.ch

Text: Corina Gustin / Flurin Caviezel
Fotografia: (c) https://flurincaviezel.ch

Suonda LATABLA!

---

Forsa er insatge per vus:

---